തിരുവനന്തപുരം: മലയാളത്തിൽ അടുത്തിറങ്ങിയ ഹിറ്റ് ചിത്രമായ കുമ്പളങ്ങി നൈറ്റ്സിലെ ഡയലോഗാണ് ' ഷമ്മി ഹീറോയാടാ ഹീറോ'എന്നാൽ ഷമ്മി ഹീറോ അല്ലാട്ടാ സീറോയാ.. എന്ന് പറഞ്ഞ് രംഗത്തെത്തിയിരിക്കുകയാണ് കേരള പൊലീസ്. കുമ്പളങ്ങി നൈറ്റ്‌സിലെ ഷമ്മിയെന്ന കഥാപാത്രത്തെ കൂട്ടുപിടിച്ച്‌ ഹൈ ബീം ലൈറ്റുകളിട്ട് വാഹനമോടിക്കുന്നവർക്ക് താക്കീത് നല്‍കുകയാണ് കേരള പൊലീസ്. കേരള പൊലീസിന്റെ ഔദ്യോഗിക ഫേസ്ബുക്ക് പേജിലൂടെയാണ് മുന്നറിയിപ്പ് നൽകിയിരിക്കുന്നത്.

'ഹൈ ബീം ലൈറ്റുകൾ ഇട്ട് വാഹനം ഓടിക്കുന്ന പ്രവണത ഇപ്പോൾ വർദ്ധിച്ചുവരുന്നതായി കാണപ്പെടുന്നു. ഈ ശീലം വലിയ അപകടങ്ങൾക്ക് കാരണമാകാം. എതിരെ വരുന്ന യാത്രക്കാരന്റെ ജീവന് വില കൊടുക്കാതെ വാഹനം ഓടിക്കുന്ന ഡ്രൈവർ ആണ് നിങ്ങളെങ്കിൽ സൂക്ഷിക്കുക. നിങ്ങളുടെ ഉള്ളിലും ഒരു സൈക്കോ ഒളിഞ്ഞിരിപ്പുണ്ട്', കേരള പൊലീസ് കുറിക്കുന്നു.

ഫേസ്ബുക്ക് പോസ്റ്റിന് മികച്ച പ്രതികരണമാണ് സോഷ്യൽ മീഡിയയിൽ ലഭിക്കുന്നത്.