തിരുവനന്തപുരം: സംസ്ഥാനത്തിന്റെ പലഭാഗങ്ങളിലും ചൂട് വർധിക്കുന്നതിനാൽ അത്തരം പ്രദേശങ്ങളിലെ അങ്കണവാടികളുടെ പ്രവർത്തന സമയം മാറ്റാൻ വനിത ശിശു വികസന വകുപ്പ് ഡയറക്ടർ ഷീബ ജോർജ് ഐ.എ.എസ്. നിർദേശം നൽകി. തദ്ദേശ സ്വയംഭരണ സ്ഥാപനങ്ങളുടെ കൂടി തീരുമാനത്തോടെ പ്രവർത്തന സമയം രാവിലെ 7 മുതൽ ഉച്ചയ്ക്ക് 12 വരേയോ രാവിലെ 8 മണി മുതല്‍ ഉച്ചയ്ക്ക് 1 മണിവരേയോ ആക്കാനാണ് നിർദേശം നൽകിയിരിക്കുന്നത്. അതത് തദ്ദേശ സ്വയംഭരണ സ്ഥാപനങ്ങളാണ് അത്തരം അങ്കണവാടികൾ തീരുമാനിക്കുക. മറ്റ് സ്ഥലങ്ങളിലെ അങ്കണവാടികൾ കൃത്യമായി പ്രവർത്തിക്കുന്നതാണ്.

വർധിച്ച ചൂട് കാരണം ചില അങ്കണവാടികൾ അടച്ചിടേണ്ട അവസ്ഥ ഉണ്ടായതായി റിപ്പോര്‍ട്ടുണ്ട്. അങ്കണവാടികൾ അടച്ചിട്ടാൽ കുട്ടികൾക്ക് നൽകേണ്ട പോഷകാഹാരങ്ങൾ കൃത്യമായി ലഭിക്കാതെ വരും. അതിനാലാണ് അതത് തദ്ദേശ സ്വയംഭരണ സ്ഥാപനങ്ങളുടെ തീരുമാനമനുസരിച്ച് സമയക്രമം മാറ്റുവാൻ നിർദേശം നൽകിയത്.