പാട്ന: നിർത്താതെ കരഞ്ഞതിനെ തുടർന്ന് അമ്മ മകന്റെ ചുണ്ടുകൾ ഗ്ലൂ കൊണ്ട് ഒട്ടിച്ചു. ബീഹാറിലെ ചപ്രയിലാണ് വിചിത്രമായ സംഭവം നടന്നത്.

ജോലി കഴിഞ്ഞ് വീട്ടിലെത്തിയ കുട്ടിയുടെ അച്ഛനായിരുന്നു സംഭവം തിരിച്ചറിഞ്ഞത്. ''വീട്ടിലെത്തിയപ്പോൾ കുഞ്ഞ് മിണ്ടാതെ കിടക്കുന്നതാണ് കണ്ടത്. നോക്കിയപ്പോൾ ചുണ്ടിൽ നിന്ന് എന്തോ ഒഴുകുന്നത് ശ്രദ്ധയിൽ പെടുകയായിരുന്നു.''

തുടർന്ന് ഭാര്യ ശോഭയോട് കുഞ്ഞിന് എന്തുപറ്റി എന്ന് ചോദിച്ചപ്പോൾ​ ''അവൻ നിർത്താതെ കരച്ചിലായിരുന്നു. കരയാതിരിക്കാനായിട്ടാണ് ചുണ്ടുകളിൽ ഗ്ലൂ ഒഴിച്ച് ഒട്ടിച്ചത്'' എന്ന മറുപടിയാണ് ലഭിച്ചതെന്ന് കുട്ടിയുടെ അച്ഛൻ പറഞ്ഞു.

ഉടൻ തന്നെ കുഞ്ഞിനെ ആശുപത്രിയിലെത്തിക്കുകയായിരുന്നു. നിലവിൽ കുട്ടി അപകടനില തരണം ചെയതതായി ഡോക്ടർമാർ അറിയിച്ചു.