പാറശാല: തിരുവനന്തപുരം പാറശാലയിൽ മദ്ധ്യവയസ്കൻ കുഴഞ്ഞുവീണു മരിച്ചു. കോടതി ജീവനക്കാരനായ കരുണാകരന്റെ (43)​ മൃതദേഹമാണ് വയലിൽ പൊള്ളലേറ്റ നിലയിൽ കണ്ടെത്തിയത്.

താലൂക്ക് ആശുപത്രിയിൽ മൃതദേഹം എത്തിച്ചതിനെ തുടർന്ന് നടത്തിയ പ്രാഥമിക പരിശോധനയിൽ സൂര്യാഘാതമാണ് മരണകാരണമെന്ന് സംശയിക്കുന്നു. എന്നാൽ പോസ്റ്റ്മോർട്ടത്തിന് ശേഷം മാത്രമേ ഇക്കാര്യം സ്ഥിരീകരിക്കാനാവുമെന്ന് ഡോക്ടർമാർ പറയുന്നു.

കണ്ണൂരിലെ വെള്ളോറയിലും മദ്ധ്യവയസ്കൻ കുഴഞ്ഞുവീണു മരിച്ചു. കാടൻവീട്ടിൽ നാരായണൻ (67)​ആണ് മരിച്ചത്. ശരീരത്തിൽ പൊള്ളലേറ്റ പാടുകൾ കണ്ടെത്തിയിടട്ടുണ്ട്.

അതേസമയം,​ സംസ്ഥാനത്ത് വേനൽച്ചൂട് റിക്കാർഡുകളും തകർത്ത് മുന്നേറുകയാണ്. വരും ദിവസങ്ങളിലും വലിയ താപനിലയ്‌ക്കുതന്നെയാണ് സാദ്ധ്യത. 23, 24 തീയതികളിൽ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശ്ശൂർ, പാലക്കാട്, കോഴിക്കോട്, കണ്ണൂർ ജില്ലകളിൽ രണ്ട് മുതൽ മൂന്ന് വരെ ചൂട് ഉയർന്നേക്കും. 25, 26 തീയതികളിൽ കൊല്ലം, ആലപ്പുഴ, കോട്ടയം, എറണാകുളം, തൃശ്ശൂർ ജില്ലകളിൽ മൂന്ന് മുതൽ നാല് വരെ ഡിഗ്രി വരെയാണ് ചൂടിന്റെ കാഠിന്യമേറുക.