പനാജി: ഗോവയടക്കം ഇന്ത്യയിലെ ജൂതകേന്ദ്രങ്ങളിൽ കേന്ദ്ര അന്വേഷണ ഏജൻസിയുടെ സുരക്ഷാ മുന്നറിയിപ്പ്. ഇസ്രായേലിൽ നിന്നുൾപ്പെടെ നിരവധി ക്രൈസ്തവ,​ ജൂത സഞ്ചാരികൾ ധാരാളമെത്തുന്ന വിനോദസഞ്ചാരകേന്ദ്രമെന്ന നിലയിലാണ് ഗോവയിൽ സുരക്ഷാ മുന്നറിയിപ്പ് നൽകിയത്. ഇക്കാര്യം ഗോവ പൊലീസ് തലവൻ ജസ്‌പാൽ സിംഗ് സ്ഥിരീകരിച്ചു. ഭീകരസംഘടനകളായ ഐസിസും അഷഖ്വയ്ദയുമാണ് ആക്രമണത്തിന് പദ്ധതിയിടുന്നതെന്നാണ് റിപ്പോർട്ട്.

ന്യൂസിലാൻഡിലെ ക്രൈസ്റ്റ് ചർച്ച് ഭീകരാക്രമണത്തിന്റെ പശ്ചാത്തലത്തിൽ ലോകത്ത് പലയിടങ്ങളിലും ക്രൈസ്തവർക്കെതിരായ ഭീകരാക്രമണങ്ങൾ നടന്നേക്കുമെന്നുള്ള രഹസ്യവിവരത്തിന്റെ അടിസ്ഥാനത്തിലാണ് അന്വേഷണ ഏജൻസിയുടെ മുന്നറിയിപ്പ്. മുസ്ലീം വിരുദ്ധ,​ തീവ്രവെള്ളക്കാരനാണ് ക്രൈസ്റ്റ് ചർച്ചിൽ 49 പേരുടെ മരണത്തിനിടയാക്കിയ വെടിവയ്പ് നടത്തിയത്. ഡൽഹിയിലെ ഇസ്രായേൽ എംബസി,​ മുംബയിലെ ഇസ്രായേൽ കോൺസുലേറ്റ് ജനറലിന്റെ കാര്യാലയം,​ ജൂത സിനഗോഗുകൾ,​ ക്രൈസ്തവ,​ ജൂത ദേവാലയങ്ങൾ ഉള്ള സംസ്ഥാനങ്ങൾ,​ കേന്ദ്രഭരണപ്രദേശങ്ങൾ എന്നിവിടങ്ങളിലും മുന്നറിയിപ്പ് നൽകിയിട്ടുണ്ട്.