കുട്ടനാട്: പീഡനശ്രമം അഭ്യാസ മുറയിലൂടെ പരാജയപ്പെടുത്തിയ പതിനഞ്ചുകാരിയുടെ പരാതിയിൽ പിതാവിന്റെ സുഹൃത്ത് അറസ്റ്റിൽ. രാമങ്കരി പഞ്ചായത്ത് മാമ്പുഴക്കരി ബ്ലോക്ക് നമ്പർ രണ്ടിൽ സനീഷ് കുമാറിനെയാണ് (35) രാമങ്കരി എസ്.ഐ ആനന്ദബാബുവിൻറെ നേതൃത്വത്തിൽ അറസ്റ്റ് ചെയ്തത്.

പൊലീസ് പറയുന്നത്:. പിതാവിന്റെ സുഹൃത്തായ സനീഷ് പെൺകുട്ടിയുമായും പരിചയത്തിലായിരുന്നു. കഴിഞ്ഞ ഒക്ടോബറിൽ പ്രതിയുടെ വീട്ടിലെത്തവേ, വലിച്ചിഴച്ച് വീട്ടിനുള്ളിലാക്കി പീഡിപ്പിക്കാൻ ശ്രമിക്കുകയായിരുന്നു. ഈ സമയം പ്രതിയുടെ വീട്ടിൽ ആരുമുണ്ടായിരുന്നില്ല. കുങ്ഫു അഭ്യസിച്ചിരുന്ന പെൺകുട്ടി പ്രതിയെ അടിച്ചുവീഴ്ത്തി രക്ഷപ്പെടുകയായിരുന്നു. എന്നാൽ മൊബൈലിൽ ഫോട്ടോയുണ്ടെന്ന് ഭീഷണിപ്പെടുത്തി വീണ്ടും പെൺകുട്ടിയെ വലയിലാക്കാനുള്ള ശ്രമം തുടരവേയാണ് പരാതിയെ തുടർന്ന് പൊലീസ് ഇയാളെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡു ചെയ്തു..