ആലപ്പുഴ: ബി.ഡി.ജെ.എസ് സംസ്ഥാന പ്രസിഡന്റ് തുഷാർ വെള്ളാപ്പള്ളി തൃശൂരിലും വൈസ് പ്രസിഡന്റ് പൈലി വാത്തിയാട്ട് വയനാട്ടിലും മത്സരിക്കും. ചേർത്തലയിൽ നടത്തിയ വാർത്താസമ്മേളനത്തിൽ തൃശൂർ ജില്ലാ പ്രസിഡന്റ് കെ.വി. സദാനന്ദനാണ് തുഷാറിന്റെ സ്ഥാനാർത്ഥിത്വം പ്രഖ്യാപിച്ചത്. പൈലിയുടെ സ്ഥാനാർത്ഥിത്വം തുഷാറാണ് പ്രഖ്യാപിച്ചത്. ഇതോടെ ബി.ഡി.ജെ.എസ് മത്സരിക്കുന്ന അഞ്ച് മണ്ഡലങ്ങളിലെയും സ്ഥാനാർത്ഥികളായി.
മൂന്ന് സ്ഥാനാർത്ഥികളെ കഴിഞ്ഞദിവസം പ്രഖ്യാപിച്ചിരുന്നു.
ഇന്ന് രാവിലെ ഒമ്പതിന് ശിവഗിരി മഹാസമാധിയിൽ പ്രണാമമർപ്പിച്ച് കൊല്ലത്ത് എസ്.എൻ.ഡി.പി യോഗം ക്യാമ്പ് ഹൗസിലുള്ള പിതാവ് വെള്ളാപ്പള്ളി നടേശനെയും അമ്മ പ്രീതി നടേശനെയും കണ്ട് അനുഗ്രഹം വാങ്ങുമെന്ന് തുഷാർ പറഞ്ഞു. കൂടാതെ മാതാ അമൃതാനന്ദമയിയെ കണ്ട് അനുഗ്രഹം വാങ്ങി പന്മന ചട്ടമ്പി സ്വാമി സ്‌മാരകത്തിൽ പുഷ്പാർച്ചനയും നടത്തും. തുടർന്ന് കണിച്ചുകുളങ്ങരയിലെ വീട്ടിൽ തങ്ങും. നാളെ രാവിലെ തൃശൂർ വടക്കുംനാഥ ക്ഷേത്രത്തിനു മുന്നിൽ നിന്ന് പ്രചാരണം ആരംഭിക്കും. തൃശൂരടക്കം അഞ്ച് മണ്ഡലങ്ങളിൽ എൻ.ഡി.എ വിജയിക്കുമെന്നും തുഷാർ പറഞ്ഞു.
അക്കീരമൺ കാളിദാസ ഭട്ടതിരിപ്പാട് ബി.ഡി.ജെ.എസ് വിട്ടതിനെപ്പറ്റി ചോദിച്ചപ്പോൾ അദ്ദേഹം കുറേനാളായി പ്രവർത്തനത്തിനൊന്നും വരാറില്ലെന്നും ബ്രാഹ്മണസഭയുടെ പ്രവർത്തകനായതുകൊണ്ട് താത്പര്യമില്ലെന്നു പറഞ്ഞ് നേരത്തേ പോയതാണെന്നും തുഷാർ പറഞ്ഞു. ബി.ഡി.ജെ.എസ് വൈസ് പ്രസിഡന്റ് അരയാക്കണ്ടി സന്തോഷ്, ജനറൽ സെക്രട്ടറിമാരായ സുബാഷ് വാസു, കെ.കെ. മഹേശൻ, തൃശൂർ ജില്ലാ പ്രസിഡന്റ് കെ.വി. സദാനന്ദൻ എന്നിവരും വാർത്താസമ്മേളനത്തിൽ പങ്കെടുത്തു.
'തൃശൂരിൽ ജയിച്ചിരിക്കും. ഒരു സംശയവുമില്ല. തോൽക്കാൻവേണ്ടി അവിടെ പോയി മത്സരിക്കില്ലല്ലോ. എനിക്ക് ഒരുപാട് ബന്ധങ്ങളുള്ള സ്ഥലമാണ് തൃശൂർ. ഇരിങ്ങാലക്കുട സ്കൂളിലാണ് ഞാൻ പഠിച്ചത്. ഒരുപാട് സുഹൃത്തുക്കളുണ്ട്. എസ്.എൻ.ഡി.പി യോഗം, എൻ.എസ്.എസ്, എഴുത്തച്ഛൻ വിഭാഗം തുടങ്ങി എല്ലാവരുമായി നല്ല ബന്ധമാണ്. അച്ഛന്റെ അനുഗ്രഹത്തോടുകൂടിയാണ് മത്സരിക്കുന്നത്. പ്രചാരണത്തിന് മോദിയടക്കമുള്ള നേതാക്കൾ വരും. വയനാട്ടിൽ രാഹുൽ ഗാന്ധി മത്സരിക്കാനെത്തിയാൽ ബി.ഡി.ജെ.എസ് സ്ഥാനാർത്ഥിക്ക് മാറ്റമുണ്ടാകാം. ഞാൻ എൻ.ഡി.എയുടെ സംസ്ഥാന കൺവീനർ കൂടിയാണ്. ആ നിലയിൽ പറ്റിയ സ്ഥാനാർത്ഥിയെ അപ്പോൾ കണ്ടെത്തും. ബി.ഡി.ജെ.എസിന്റെ കുടം അടയാളത്തിൽ മത്സരിക്കാൻ വിസമ്മതിച്ചതിനാണ് വയനാട്ടിൽ സ്ഥാനാർത്ഥിയായി പരിഗണിച്ച ആന്റോ അഗസ്റ്റിനെ മാറ്റിയത്".
- തുഷാർ