കോഴിക്കോട്: വയനാട്ടിൽ രാഹുല്‍ ഗാന്ധി മത്സരിക്കുന്ന കാര്യത്തിൽ നിലപാട് മാറ്റി മുൻ മുഖ്യമന്ത്രി ഉമ്മൻ ചാണ്ടി. രാഹുൽ മത്സരിക്കുമെന്ന് താൻ പറഞ്ഞിട്ടില്ല, മത്സരിക്കണമെന്ന ആവശ്യം ഉന്നയിക്കുക മാത്രമാണ്ചെയ്തതെന്നും ഉമ്മൻ ചാണ്ടി മാദ്ധ്യമങ്ങളോട് പറഞ്ഞു. വയനാട്ടിൽ മത്സരിക്കുന്ന കാര്യത്തെക്കുറിച്ച് രാഹുലിന് സൂചന നൽകാൻ മാത്രമേ കഴിയുകയുള്ളു എന്ന് അദ്ദേഹം കൂട്ടിച്ചേർത്തു.

തമിഴ്‌നാട്ടിലും കർണാടകത്തിലും രാഹുൽ ഗാന്ധി മത്സരിക്കണമെന്ന ആവശ്യം ഉയർന്നപ്പോൾ കേരളത്തിലും അദ്ദേഹം മത്സരിക്കണമെന്ന താൽപര്യം അദ്ദേഹത്തെ അറിയിക്കുക മാത്രമേ ചെയ്തിട്ടുള്ളു. രാഹുൽ അമേത്തിയിൽ മത്സരിക്കുന്നതിനോടൊപ്പം രണ്ടാമത് ഒരിടത്ത് നിന്ന് കൂടി മത്സരിക്കണമെന്ന ആവശ്യം പാർട്ടിയിൽ എല്ലാവർക്കുമുണ്ട്. എന്നാൽ വയനാട്ടിൽ മത്സരിക്കുന്ന കാര്യത്തിൽ ഇതുവരെ തീരുമാനമായിട്ടില്ലെന്നും ഉമ്മൻ ചാണ്ടി വ്യക്തമാക്കി.

വയനാട്ടിൽ രാഹുൽ മത്സരിക്കാനില്ലെങ്കിൽ ആരാകും സ്ഥാനാർത്ഥിയെന്ന് കേന്ദ്ര തിരഞ്ഞെടുപ്പ് കമ്മറ്റി തീരുമാനിക്കുമെന്ന് ഉമ്മൻ ചാണ്ടി പറഞ്ഞു. അതേസമയം വയനാട്ടിൽ സ്ഥാനാർത്ഥിയായി തീരുമാനിച്ച ടി.സിദ്ദിഖിനെ സ്ഥാനാർത്ഥിയാക്കുന്ന കാര്യത്തിലും അവ്യക്തതയാണുള്ളത്. ഇതിനെ സംബന്ധിച്ച് ഹൈക്കമാന്റ് ഇപ്പോഴും തീരുമാനമെടുത്തിട്ടില്ല എന്ന കാര്യം വ്യക്തമാണ്. ഉമ്മൻ ചാണ്ടിയായിരുന്നു നേരത്തേ രാഹുൽ ഗാന്ധി കേരളത്തിൽ മത്സരിക്കുമെന്ന കാര്യത്തെ കുറിച്ച് വ്യക്തമായ സൂചന നൽകിയത്.