മലയാളസിനിമയിൽ മറ്റൊരു റെക്കാ‌ഡ് കുറിക്കാൻ തിയേറ്ററുകളിൽ മുന്നേറുകയാണ് ലൂസിഫർ. സ്‌റ്റീഫൻ നെടമ്പള്ളി എന്ന മാസ് എന്റർടെയ്‌നറെ മോഹൻലാലിലൂടെ പ്രേക്ഷകന് മുന്നിൽ എത്തിച്ച പൃഥ്വിരാജ് താനൊരു മികച്ച സംവിധായകൻ തന്നെയെന്ന് പ്രേക്ഷകനെ കൊണ്ട് പറയിച്ചു കഴിഞ്ഞു. എന്നാൽ ലൂസിഫർ വിജയത്തിൽ ഏറ്റവുമധികം സന്തോഷിക്കുന്നത് ആരാണെന്ന് ചോദിച്ചാൽ ഉത്തരം മല്ലികാ സുകുമാരൻ എന്നുതന്നെ പറയേണ്ടിവരും. 'പോയ ജന്മത്തിൽ ചെയ്‌ത സുകൃതം' തിരുവനന്തപുരത്ത് ന്യൂ തിയേറ്ററിൽ സിനിമ കാണാൻ കയറുന്നതിന് മുമ്പ് മാദ്ധ്യമങ്ങളോട് പ്രതികരിക്കവെ മല്ലികാ സുകുമാരൻ പറഞ്ഞ വാക്കുകളാണിത്. സന്തോഷത്താൽ അവരുടെ കണ്ണുകൾ നിറഞ്ഞിരുന്നു. 'ഒരമ്മതൻ കണ്ണിനമൃതം, പോയ ജന്മത്തിൽ ചെയ്‌ത സുകൃതം. ഇതിൽ കൂടുതൽ എന്തുപറയാനാണ്'- ഇതായിരുന്നു മല്ലികയുടെ വാക്കുകൾ.
ടൊവിനോ തോമസ്, മഞ്ജു വാര്യർ, വിവേക് ഒബ്‌റോയി, ഇന്ദ്രജിത്ത് സുകുമാരൻ, സായി കുമാർ, കലാഭവൻ ഷാജോൺ, ബൈജു, നന്ദു, ഫാസിൽ തുടങ്ങിയ വൻതാരനിരയ്‌ക്കൊപ്പം പൃഥ്വിരാജും ലൂസിഫറിൽ ഒരു പ്രധാന വേഷത്തിൽ എത്തുന്നുണ്ട്. ഇതുവരെയുള്ള എഴുത്തിൽ നിന്നെല്ലാം വിഭിന്നമായി ഒരു പക്കാ മാസ് എന്റർടെയ്നറായാണ് മുരളി ഗോപി ലൂസിഫറിന്റെ തിരക്കഥ ഒരുക്കിയിരിക്കുന്നത്. 'ലാലേട്ടനെ ഞാൻ എങ്ങനെയാണോ കാണാൻ ആഗ്രഹിച്ചത് ആതാണ് ലൂസിഫർ' എന്ന വാക്ക് പൃഥ്വിരാജ് പാലിച്ചതിന്റെ ആഹ്ളാദത്തിലാണ് ആരാധകരും.