ചെന്നൈ : മധുരൈ ലോക്സഭാമണ്ഡലത്തിലെ സ്ഥാനാർത്ഥിയുടെ പോസ്റ്റർ വൈറലായത് കേരളത്തിൽ. തമിഴ് തെരിയാത്ത മലയാളികളുടെ ഇടയിൽ ഈ പോസ്റ്ററിനെ വൈറലാക്കിയത് ഇതിലെ ഫോട്ടോകളാണ്. കേരളത്തിൽ മുഖാമുഖം എതിരാളികളായി തിരഞ്ഞെടുപ്പിൽ മത്സരിക്കുന്ന കോൺഗ്രസും സി.പി.എമ്മും തമിഴ്നാട്ടിൽ ഘടകകക്ഷികളായി ഭായി ഭായി ബന്ധമാണുള്ളത്. തിരഞ്ഞെടുപ്പിൽ സഖ്യകക്ഷികൾക്കായി സീറ്റുകൾ വീതം വച്ചപ്പോൾ മധുരൈ മണ്ഡലം സി.പി.എമ്മിനാണ് ലഭിച്ചത്. ഇവിടെ സ്ഥാനാർത്ഥിയായി മത്സരിക്കുന്ന എസ്.വെങ്കിടേശ്വന്റെ തിരഞ്ഞെടുപ്പ് പോസ്റ്ററാണ് വൈറലായത്. തമിഴ്നാട്ടിൽ പോസ്റ്റർ ഇറക്കുമ്പോൾ സഖ്യകക്ഷികളിലെ നേതാക്കളുടെ ചിത്രം കൂടി വയ്ക്കുന്ന പതിവുണ്ട്. അതിനാലാണ് കോൺഗ്രസ് ദേശീയ അദ്ധ്യക്ഷൻ രാഹുൽ ഗാന്ധിയുടെ ചിത്രവും ഉൾപ്പെടുത്തിയത്.

അരിവാൾ ചുറ്റിക നക്ഷത്രം അടയാളമായി നൽകിയ പോസ്റ്ററിൽ രാഹുൽ ഗാന്ധിയുടെ ചിത്രം കൂടി ഉൾപ്പെട്ടതോടെയാണ് ഈ പോസ്റ്റർ കേരളത്തിലും വൈറലാവാൻ കാരണമായത്. രാഹുലിനൊപ്പം മുസ്ലിം ലീഗ് അഖിലേന്ത്യാ അധ്യക്ഷൻ ഖാദർ മൊയ്തീന്റെ ചിത്രവും പോസ്റ്ററിലുണ്ട്.കോൺഗ്രസ് ദേശീയ അദ്ധ്യക്ഷനെ ഉൾപ്പെടുത്തിയ പോസ്റ്ററിൽ സ്വന്തം പാർട്ടിയിലെ ദേശീയ നേതാക്കളെ ഉൾപ്പെടുത്താതിരുന്നതും കേരളത്തിൽ ചർച്ചയായിരിക്കുകയാണ്.