തിരൂരങ്ങാടി: പൈപ്പ് ലൈനിടാൻ കുഴിയെടുത്തപ്പോൾ കൂട്ടിയിട്ട മണ്ണിൽ കയറിയ ബൈക്ക് മറിഞ്ഞ് റോഡിൽ വീണ വീട്ടമ്മ ടിപ്പർലോറി കയറി മരിച്ചു. എ.ആർ നഗർ കൊടുവായൂർ എടപ്പയിൽ പ്രീതാഭായ് (53) ആണ് മരിച്ചത്. ഇന്നലെ രാവിലെ എട്ടിന് ഭർത്താവ് നെച്ചിക്കാടൻ ചന്ദ്രനൊപ്പം തൊട്ടടുത്ത ആശുപത്രിയിലേക്ക് പോവുമ്പോഴാണ് അപകടം. എ.ആർ നഗർ പഞ്ചായത്ത് കുടിവെള്ള പദ്ധതിക്ക് ചാൽ കീറുന്നതിന്റെ ഭാഗമായി മണ്ണ് റോഡരികിൽ കൂട്ടിയിട്ടിരുന്നു. വളവ് തിരിഞ്ഞ് റോഡിലേക്ക് കയറിയപ്പോൾ റോഡിലേക്ക് കിടന്നിരുന്ന മണ്ണിൽ കയറി ബൈക്ക് മറിഞ്ഞു. റോഡിലേക്ക് വീണ പ്രീതാഭായിയുടെ ദേഹത്തു കൂടി ടിപ്പർ ലോറി കയറിയിറങ്ങുകയായിരുന്നു. ഉടൻ തിരൂരങ്ങാടി താലൂക്ക് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഭർത്താവ് നെച്ചിക്കാടൻ ചന്ദ്രൻ റിട്ട.വാട്ടർ അതോറിട്ടി ജീവനക്കാരനും ഐ.എൻ.ടി.യു.സി മുൻ ജില്ലാ സെക്രട്ടറിയുമാണ്. മക്കൾ: അർജുൻ ചന്ദ് (ബി.എസ്.എൻ.എൽ, പരപ്പനങ്ങാടി), ആരതി ഭായ് (എ.ആർ.നഗർ സഹകരണബാങ്ക്), അമൃത ഭായി (മിംസ്, കോട്ടയ്ക്കൽ) മൃതദേഹം പോസ്റ്റ്‌മോർട്ടത്തിനു ശേഷം ഇന്നലെ വൈകിട്ട് വീട്ടുവളപ്പിൽ സംസ്‌കരിച്ചു.