പൊന്നാനി: പ്രളയത്തിൽ പൂർണ്ണമായി തകർന്ന പൊന്നാനി നിയോജക മണ്ഡലത്തിലെ വീടുകൾക്ക് പകരമൊരുക്കുന്ന സ്‌നേഹ ബൊമ്മാടങ്ങൾക്ക് ശിലയിട്ടു. പെരുമ്പടപ്പ് കുണ്ടുച്ചിറ പാലത്തിന് അടിയിൽ താമസിക്കുന്ന 25 കുടുംബങ്ങൾക്കാണ് തുടക്കത്തിൽ വീടുകൾ നിർമ്മിച്ചു നൽകുന്നത്. അയിരൂരിൽ നടന്ന ചടങ്ങിൽ വീടുകളുടെ നിർമ്മാണോദ്ഘാടനം സ്പീക്കർ പി ശ്രീരാമകൃഷ്ണൻ നിർവ്വഹിച്ചു. പെരുമ്പടപ്പ് ബ്ലോക്ക് പഞ്ചായത്ത് പ്രസിഡന്റ് പി എം ആറ്റുണ്ണിതങ്ങൾ അധ്യക്ഷത വഹിച്ചു.
അന്താരാഷ്ട്ര മലയാളി സംഘടനകളടേതുൾപ്പെടെ സഹായത്തോടെയാണ് സ്വന്തമായി ഭൂമിയുള്ളവർക്കായി സ്‌നേഹ ബൊമ്മാടങ്ങൾ എന്ന പേരിൽ വീടുകൾ നിർമ്മിച്ചു നൽകുന്നത്. അഞ്ച് ലക്ഷം രൂപ ചിലവിലുള്ള വീടുകളാണ് നിർമ്മിച്ചു നൽകുക. സർക്കാർ ധനസഹായമില്ലാതെ സ്വകാര്യ വ്യക്തികളിൽ നിന്നും വിദേശത്തെ മലയാളി സംഘടനകളിൽ നിന്നും സ്പീക്കറുടെ മുൻകൈയ്യിൽ പണം കണ്ടെത്തിയാണ് സ്‌നേഹ ബെമ്മാടം ഭവന പദ്ധതി നടപ്പാക്കുന്നത്.
പ്രളയാനന്തരം ഡ്രോൺ ക്യാമറ ഉപയോഗിച്ച് നടത്തിയ റിയൽ ടൈം സർവ്വെ പ്രകാരം കണ്ടെത്തിയ വീടുകളാണ് പുനർനിർമ്മിച്ചു നൽകുക. ആദ്യഘട്ടത്തിൽ 50 വീടുകളാണ് നിർമ്മിച്ചു നൽകുന്നത്. പൊന്നാനി നഗരസഭയിലെ 17 വീടുകൾ കോട്ടത്തറിയിലെ ലക്ഷം വീട് കോളനിയിൽ നിർമ്മിച്ചു നൽകാനാണ് സ്ഥലം കണ്ടെത്തിയിരിക്കുന്നത്. അമേരിക്കയിലെ മലയാളി സംഘടനയുടെ സഹായത്തോടെയാണ് ഇവിടെ വീടുകൾ നിർമ്മിക്കുക. മാറഞ്ചേരി പഞ്ചായത്തിലെ കുണ്ടുകടവ് പാലത്തിന് സമീപം റോഡ് പുറമ്പോക്കിൽ താമസിക്കുന്ന 13 കുടുംബങ്ങളെയും പുനരധിവസിപ്പിക്കും. മാറഞ്ചേരിയിലെ ഡോ.മുഹമ്മദ് ബിൻ അഹമ്മദ് നൽകുന്ന 30 സെന്റ് സ്ഥലത്തായിരിക്കും ഇവർക്ക് വീടൊരുക്കുക.
600 സ്‌ക്വയർ ഫീറ്റിൽ അഞ്ച് ലക്ഷം രൂപ ചിലവിൽ സുന്ദരമായ വീടാണ് പദ്ധതിയിലൂടെ ഉദ്ദേശിക്കുന്നത്. ആർക്കിടെക്ട് ശങ്കർ, സിഡ്‌കൊ, ഫെഡൊ എന്നിവരുടെ ഏഞ്ചൻസികളുടെ സാങ്കേതിക ഉപദേശം പദ്ധതിയുടെ കാര്യത്തിൽ തേടിയിരുന്നു.പദ്ധതിക്കായി പണം മുടക്കുന്നവർ നേരിട്ട് നിർമ്മാണ പ്രവർത്തനങ്ങൾ നടത്തുന്നതിന് അവസരമൊരുക്കും.ഇതിനായി സഹായങ്ങൾ നൽകുമെന്നും. ആദ്യഘട്ടത്തിൽ നിർമ്മിക്കുന്ന 50 വീടുകൾക്കും സ്‌പോൺസർമാരെ കണ്ടെത്തിയിട്ടുണ്ട്.
പ്രളയബാധിതർക്കായി സർക്കാർ സഹായത്തിനു പുറമെയുള്ള പ്രവർത്തനങ്ങളാണിത്. ദുരിതബാധിതർക്കായി ലൈഫ്, മത്സ്യത്തൊഴിലാളി ഭവന പദ്ധതി എന്നിവക്ക് പുറമെയാണ് സ്‌നേഹ ബെമ്മാടങ്ങൾ ഒരുങ്ങുക. ഗൾഫ് രാജ്യങ്ങളിലേയും മറ്റും മലയാളി സംഘടനകൾ ഉൾപ്പെടെ സ്‌നേഹ ബെമ്മാടങ്ങൾക്ക് ഫണ്ട് വാഗ്ദാനം ചെയ്തിട്ടുണ്ട്. ഇവ ലഭ്യമാകുന്നതിനനുസരിച്ച് കൂടുതൽ വീടുകൾ നിർമ്മിച്ചു നൽകും.