കൊല്ലങ്കോട്: പനങ്ങാട്ടിരി കൗണ്ടതറയിൽ മണി (52),​ എലവഞ്ചേരി സ്വദേശി സോമൻ (40),​ കൊല്ലങ്കോട് സ്വദേശി സുജാത (40) എന്നിവർക്ക് സൂര്യാഘാതമേറ്റു.

കൊല്ലങ്കോട് പുഴയ്ക്കൽ തറ പുളിയക്കോട് വീട്ടിൽ സുജാത കഴിഞ്ഞ ദിവസം ബാങ്കിൽ പോയി തിരിച്ച് വീട്ടിലെത്തിയപ്പോഴാണ് കഴുത്തിന് പുറകിൽ പൊള്ളലേറ്റത്. തുടർന്ന് സ്വകാര്യ ക്ലിനിക്കിൽ ചികിത്സ തേടി. ആയുർവേദ മരുന്നുകടയിലെ ജീവനക്കാരിയാണ്.

ഉച്ചയ്ക്ക് വീട്ടിൽ നിന്ന് പുറത്തിറങ്ങിയപ്പോഴാണ് എലവഞ്ചേരി സർവീസ് സഹകരണ ബാങ്ക് ജീവനക്കാരൻ സോമന് കഴുത്തിന് പുറകിലും വശങ്ങളിലും പൊള്ളലേറ്റത്. ശക്തമായ നീറ്റൽ അനുഭവിക്കാൻ തുടങ്ങിയതോടെ പരിശോധിച്ചപ്പോഴാണ് സൂര്യാതപമെന്ന് സ്ഥിരീകരിച്ചത്. കൃഷിപ്പണിയിൽ ഏർപ്പെട്ടിരിക്കുമ്പോഴാണ് മണിക്ക് കഴുത്തിലും പുറക് വശങ്ങളിലും മുതുകത്തും പൊള്ളലേറ്റത്.