നെല്ലിയാമ്പതി: കടുത്ത വേനലിൽ നെല്ലിയാമ്പതിയിൽ ചൂട് കുത്തനെ കൂടുന്നു. ചൂട് കൂടിയതോടെ തോട്ടം മേഖലയിലെ തേയിലകൾ നനച്ചു തുടങ്ങി. നെല്ലിയാമ്പതിയിലെ പകൽ താപനില ഇപ്പോൾ 30-32 ഡിഗ്രി സെൽഷ്യസ് വരെയാണ്. കഴിഞ്ഞ വർഷം 28- 30 ഡിഗ്രി സെൽഷ്യസ് ആയിരുന്നു. നെല്ലിയാമ്പതിയിൽ താപനില ഇത്രയും വർദ്ധിക്കുന്നത് ആദ്യമായാണ്.

പ്രളയാനന്തരം ഭൂഗർഭജലത്തിന്റെ അളവ് ക്രമാതീതമായി താഴ്ന്നതാണ് നെല്ലിയാമ്പതിയിലടക്കം ചൂട് പതിന്മടങ്ങ് വർദ്ധിക്കാൻ കാരണമായത്. സാധാരണ സമ ശീത കാലാവസ്ഥയുള്ള നെല്ലിയാമ്പതിയിൽ ഏപ്രിൽ​- മേയ് മാസങ്ങളിലാണ് ചൂട് കൂടുക. മാർച്ചോടെ തന്നെ ചൂട് കൂടിയതോടെ തേയില വിളവെടുപ്പിനെ സാരമായി ബാധിച്ചിട്ടുണ്ട്. ഇതോടെയാണ് തോട്ടം ഉടമകളുടെ നേതൃത്വത്തിൽ ഒന്നിടവിട്ട ദിവസങ്ങളിൽ വെള്ളം പമ്പ് ചെയ്ത് സ്‌പ്രിംഗ്ളർ ഉപയോഗിച്ച് നനച്ചു തുടങ്ങിയത്.