പത്തനംതിട്ട: കോൺഗ്രസ് അദ്ധ്യക്ഷൻ രാഹുൽ ഗാന്ധി വയനാട്ടിൽ മത്സരിക്കുമെന്ന വിവരം ഇന്നലെ ആദ്യം പുറത്തുവിട്ടത് ഉമ്മൻചാണ്ടി പത്തനംതിട്ട റാന്നിയിലായിരുന്നു. ശബരിമല മണ്ഡലകാലത്ത് നിരോധനാജ്ഞ ലംഘിച്ചതിന്റെ പേരിലുള്ള കേസിൽ ജാമ്യമെടുക്കാൻ കോടതിയിൽ ഹാജരായ ശേഷമാണ് വിവരം മാദ്ധ്യമങ്ങളെ അറിയിച്ചത്.
രാഹുൽ വയനാട്ടിൽ മത്സരിക്കണമെന്ന് കെ.പി.സി.സി ആവശ്യപ്പെട്ടതായി ഉമ്മൻചാണ്ടി പറഞ്ഞു. രാഹുൽ മത്സരിക്കുന്ന പക്ഷം വയനാട്ടിൽ നിന്ന് ടി. സിദ്ദിഖ് പിൻമാറുമെന്നും പറഞ്ഞു. റാന്നിയിലേക്കുള്ള യാത്രാമദ്ധ്യേയാണ് രാഹുൽ വയനാട്ടിൽ മത്സരിക്കുമെന്ന ഉറപ്പ് ഉമ്മൻചാണ്ടിക്കു ലഭിച്ചത്. ഇക്കാര്യം കേരളത്തിലെ കോൺഗ്രസ് നേതാക്കളെ അറിയിച്ചശേഷം എ.ഐ.സി.സി ആസ്ഥാനവുമായി ബന്ധപ്പെട്ടപ്പോൾ ഉടൻ പ്രഖ്യാപനമെന്ന സൂചന ലഭിച്ചു.

വിഷയം മാദ്ധ്യമങ്ങളെ അറിയിക്കാൻ രമേശ് ചെന്നിത്തലയും മുല്ലപ്പള്ളി രാമചന്ദ്രനും ഉമ്മൻചാണ്ടിയെ ചുമതലപ്പെടുത്തി. കോടതിയിൽ നിന്ന് ഇറങ്ങിവന്ന ഉമ്മൻചാണ്ടി മറ്റ് യു.ഡി.എഫ് നേതാക്കൾക്കൊപ്പം മാദ്ധ്യമങ്ങളെ കണ്ട് വിവരം അറിയിക്കുകയായിരുന്നു.