അംബരചുംബികളുടെ നഗരമാണ് ചൈന. പക്ഷേ ഇടത്തരക്കാർക്ക് നഗരത്തിൽ ഒരുവീടെന്നത് ഇപ്പോഴും സ്വപ്നം മാത്രമാണ്. നഗരത്തിലേക്ക് കുടിയേറിയ ചൈനയിലെ ദായി ഹൈഫെ എന്ന യുവ ഡിസൈനർ ഭീമമായ വാടക താങ്ങാനാകാതെ വന്നപ്പോളാണ് വ്യവസ്ഥിതിയോടുള്ള പ്രതിഷേധം എന്ന നിലയിൽ തെരുവിൽ തന്നെ ഒരു ചെറുവീട് നിർമിച്ചത്. ഈ വീട് മുട്ടയുടെ ആകൃതിയിലാണ്.

രണ്ടു മീറ്ററാണ് വീടിന്റെ ഉയരം. വീടിനുള്ളിൽ ഒരു ചെറിയ കിടക്ക, മേശ, കസേര, വാട്ടർ ടാങ്ക് എന്നിവയുണ്ട്. മുള കൊണ്ടുള്ള ചട്ടക്കൂടിൽ തടിപാനൽ കൊണ്ടാണ് വീട് നിർമിച്ചിരിക്കുന്നത്. രണ്ടുമാസംകൊണ്ടാണ് നിർമ്മാണം പൂർത്തിയാത്. സോളാർ പാനലിൽ നിന്നുള്ളവൈദ്യുതിയാണ് ഉപയോഗിക്കുന്നത്. ചൈന ആർക്കിടെക്ചർ പുരസ്കാരപ്പട്ടികയിൽ മുട്ടവീടിന്റെ ഡിസൈൻ ഇടം പിടിച്ചതോടെ ദായിക്ക് സെലിബ്രിറ്റി പരിവേഷം ലഭിച്ചു. ഇപ്പോൾ ഇതാ വ്യാവസായികമായി കൂടുതൽ മുട്ടവീടുകൾ നിർമിച്ചു നൽകാൻ പ്രമുഖ നിർമാണക്കമ്പനികൾ അദ്ദേഹത്തെ സമീപിച്ചിരിക്കുകയാണ് .