ഓയൂർ: കഴിഞ്ഞ ദിവസത്തെ വേനൽ മഴയിലും കാറ്റിലും വെളിയം, പൂയപ്പള്ളി, പഞ്ചായത്തുകളിൽ വ്യാപകം കൃഷി നാശം. ശക്തമായ കാ​റ്റിൽ പ്ലാവ്, മാവ് വൃക്ഷങ്ങളുടെ ശിഖരങ്ങൾ ഒടിഞ്ഞുവീണു. കുലച്ചതുൾപ്പെടെ നുറു കണക്കിന് വാഴകൾ നശിച്ചു. വെളിയം പഞ്ചായത്തിൽ കായില ഏലായിൽ പൂവണംവിള കിഴക്കതിൽ വീട്ടിൽ യശോദരന്റെ കൃഷിഭൂമിയിലെ നൂ​റ്റമ്പതോളം കുലച്ച വാഴകളും, മാലയിൽ ഏലായിൽ ശിവഗംഗയിൽ ശ്യാംകുമാർ, വെളിയം സ്വദേശി സുകുമാരപിള്ള എന്നിവരുടെ കൃഷിസ്ഥലത്തെ മുന്നൂറോളം ഏത്തവാഴകളും നശിച്ചു. മരച്ചീനി, പച്ചക്കറി കൃഷികൾക്കും വ്യാപകനാശം നേരിട്ടു.