മാള: വിജ്ഞാനദായിനി സഭ ചക്കാംപറമ്പ് ഭഗവതി ക്ഷേത്രത്തിലെ കുംഭ ഭരണി മഹോത്സവം നാളെ ആഘോഷിക്കും. ഇന്നലെ അഞ്ചാം ഉത്സവദിനത്തിൽ രാവിലെ ഭഗവതിക്ക് തോറ്റംപാട്ട്, വൈകീട്ട് ദീപക്കാഴ്ച എന്നിവ നടന്നു. ദീപം തെളിക്കാനും ദീപക്കാഴ്ച ദർശിക്കാനും നിരവധി പേരാണ് എത്തിയത്.

ആറാം ഉത്സവ ദിനമായ ഇന്ന് രാവിലെ ശീവേലി എഴുന്നള്ളിപ്പ്, ഉച്ചതിരിഞ്ഞ് കാഴ്ചശീവേലി, പൂമൂടൽ, കോട്ടവാതിൽ അംബാവനത്തിൽ പള്ളിവേട്ട എന്നിവ നടക്കും. ഭരണി മഹോത്സവ ദിനമായ നാളെ രാവിലെ ക്ഷേത്രം വക ആറാട്ട് കുളത്തിലേക്ക് ആറാട്ട് എഴുന്നള്ളിപ്പും ആറാട്ട് തിരിച്ചെഴുന്നള്ളിപ്പും നടക്കും. തുടർന്ന് പ്രസാദഊട്ട്, താലിസ്വീകരണം ഉച്ചതിരിഞ്ഞ് കാഴ്ച ശീവേലി, താലിസ്വീകരണം, വൈകീട്ട് പ്രസാദഊട്ട്, ഗുരുതി തർപ്പണം എന്നിവ നടക്കും.

രാത്രി 9.45 മുതൽ വെണ്ണൂർ - ആലത്തൂർ ജനകീയ താലാഘോഷ സംഘം, ചക്കാംപറമ്പ് വടക്കുംഭാഗം ജനകീയ താലാഘോഷ സംഘം, ചക്കാംപറമ്പ് പടിഞ്ഞാറ് ഭാഗം താലാഘോഷ സംഘം എന്നീ ദേശക്കാരുടെ താലി സ്വീകരണം, പുലർച്ചെ നനദുർഗ ക്ഷേത്രത്തിലേക്ക് എഴുന്നള്ളിപ്പ്, പൂജ, പന്തീരാഴി, ഗുരുതി തർപ്പണം, കൊടിയിറക്കൽ എന്നിവയോടെ കുംഭഭരണി ആഘോഷം സമാപിക്കും. ക്ഷേത്രത്തിലെ മറ്റൊരു പ്രധാന ചടങ്ങായ നടതുറപ്പ് ഉത്സവം മാർച്ച് 18 ന് ആഘോഷിക്കും. ഇതോടനുബന്ധിച്ച് ആചാരപ്രകാരമുള്ള ചക്രം കല്ലിലുള്ള കാവും കളവും കലം പൂജയും തെണ്ട് വഴിപാട് സമർപ്പണവും നടക്കും...