ചാവക്കാട്: ശ്രീ വിശ്വനാഥ ക്ഷേത്ര മഹോത്സവത്തിന് ആയിരങ്ങളെത്തി. രാവിലെ നാലിന് പള്ളിയുണർത്തലിനു ശേഷം ചടങ്ങുകൾ തുടങ്ങി. തുടർന്ന് നിർമാല്യ ദർശനം, ഗണപതിഹോമം, അഭിഷേകം, ഉഷപൂജ, കാഴ്ചശീവേലി, കലശാഭിഷേകം മറ്റു വിശേഷാൽ പൂജകൾ തുടങ്ങിയ താന്ത്രിക കർമ്മങ്ങൾക്ക് ക്ഷേത്രം തന്ത്രി സി.കെ.നാരായണൻകുട്ടി ശാന്തി, മേൽശാന്തി എം.കെ. ശിവാനന്ദൻ, കീഴ്ശാന്തി സുബിൻ ചന്ദ്രൻ എന്നിവർ കാർമ്മികത്വം വഹിച്ചു.

ഉച്ചക്ക് 2.30ന് ശ്രീശങ്കരപുരം പ്രകാശൻ മാരാരുടെ നേതൃത്വത്തിൽ പഞ്ചവാദ്യത്തിന്റെയും ചേരാനെല്ലൂർ ശങ്കരൻ കുട്ടി മാരാരുടെ നേതൃത്വത്തിൽ ചെണ്ടമേളത്തിന്റെയും അകമ്പടിയോടെ ക്ഷേത്ര എഴുന്നെള്ളിപ്പ് നടന്നു. വൈകിട്ട് അഞ്ചിന് വിവിധ കരകളിൽ നിന്നായി ദൃശ്യ, കോഴിക്കുളങ്ങര, ശ്രീനാരായണ സംഘം, തത്വമസി, ശ്രീമഹേശ്വര, ശ്രീ ശിവലിംഗദാസ, ഗുരുദേവ, ഗുരുശക്തി, സമന്വയ, സനാതന, നടക്കാവിന് കിഴക്ക്, നടക്കാവിന് പടിഞ്ഞാറ് തുടങ്ങിയ ഉത്സവാഘോഷ കമ്മിറ്റികളുടെ ആഭിമുഖ്യത്തിൽ വിവിധ വാദ്യമേളങ്ങളോടെ വർണക്കാവടികൾ, പ്രാചീനകലാരൂപങ്ങൾ, ഗജവീരന്മാർ എന്നിവയോടു കൂടിയ എഴുന്നെള്ളിപ്പ് ആഘോഷങ്ങൾ ക്ഷേത്രത്തിലെത്തി 5.30ന് കൂട്ടിയെഴുന്നെള്ളിപ്പു നടന്നു.

26 ഗജവീരൻമാരാണ് കൂട്ടിയെഴുന്നള്ളിപ്പിന് അണിനിരന്നത്. ദീപാരാധനയ്ക്ക് ശേഷം പുഞ്ചിരി വെടിക്കെട്ട് കമ്മിറ്റിയുടെ ഫാൻസി കരിമരുന്നും ഉണ്ടായി. ഗുരുവായൂർ തേലംപറ്റ ബ്രദേഴ്സിന്റെ തായമ്പകയും ഉണ്ടായി. രാത്രി 9.30ന് ആറാട്ട് എഴുന്നെള്ളിപ്പ് ആരംഭിച്ച് 10.30ന് ആറാട്ടും, തുടർന്ന് കൊടിയിറക്കലോട് കൂടി ഉത്സവം സമാപിച്ചു.

ശ്രീവിശ്വനാഥ ക്ഷേത്ര സമുദായ ദീപികാ യോഗം ഭാരവാഹികളായ പ്രസിഡന്റ് പ്രൊഫ. സി.സി. വിജയൻ, സെക്രട്ടറി എം.കെ. വിജയൻ, ട്രഷറർ എ.എ. ജയകുമാർ, വൈസ് പ്രസിഡന്റുമാരായ കെ.എ. വേലായുധൻ, വാക്കയിൽ മുരളീധരൻ, ജോയിന്റ്‌ സെക്രട്ടറിമാരായ കെ.ആർ. രമേഷ്, കെ.എൻ. പരമേശ്വരൻ, ആറ്റൂർ രാജൻ, എൻ.ജി. പ്രവീൺകുമാർ, എൻ.കെ. രാജൻ, എൻ.വി. സുധാകരൻ, കെ.എ. ബിജു, എം.എസ്. ജയപ്രകാശ്, കെ.കെ. സതീന്ദ്രൻ, എം.കെ. ഗോപിനാഥൻ, കെ.സി. സുരേഷ്, സി.എ. വേണുഗോപാൽ എന്നിവർ മഹോത്സവ പരിപാടിക്ക് നേതൃത്വം നൽകി. ചാവക്കാട് പൊലീസ് സ്റ്റേഷൻ എസ്.ഐമാരായ ശശീന്ദ്രൻ മേലയിൽ, നവീൻഷാജ്, എ. അബ്ദുൽ ഹക്കിം തുടങ്ങിയവരുടെ നേതൃത്വത്തിൽ വൻ പൊലീസ് സന്നാഹവും സ്ഥലത്തുണ്ടായിരുന്നു.