ചേർപ്പ്: നാദപ്പെരുമ തീർക്കുന്ന പെരുവനം പൂരം ഇന്ന്. വൈകീട്ട് നാലിന് ക്ഷേത്രത്തിൽ പിഷാരിക്കൽ ഭഗവതിയുടെ ആദ്യ പൂരം എഴുന്നള്ളിപ്പ് പടിഞ്ഞാറെ നടവഴിയിൽ നടക്കും. അഞ്ച് ഗജവീരൻമാർ അണിനിരക്കുന്ന എഴുന്നള്ളിപ്പിൽ പെരുവനം ശങ്കരനാരായണൻ മാരാരുടെ നേതൃത്വത്തിൽ പഞ്ചാരിമേളം ഉണ്ടാകും. ഏഴ് ഗജവീരൻമാരുടെ അകമ്പടിയോടെ 6.30ന് ആറാട്ടുപുഴ ശാസ്താവിന്റെ കിഴക്കോട്ടിറക്കം നടക്കും. പെരുവനം കുട്ടൻമാരാരുടെ നേതൃത്വത്തിൽ പാണ്ടിമേളം നാദപ്രപഞ്ചം തീർക്കും.

ഏഴിന് ചാത്തക്കുടം ശാസ്താവിന്റെയും തൊട്ടിപ്പാൾ ഭഗവതിയുടെയും എഴുന്നള്ളിപ്പുകൾ നടക്കും. ഏഴ് ഗജവീരൻമാർ അകമ്പടിയാകും. പെരുവനം സതീശൻ മാരാരുടെ നേതൃത്വത്തിൽ പഞ്ചാരിമേളം ഉണ്ടാകും. രാത്രി 10.30 ന് ആറാട്ടുപുഴ കല്ലേലി, മേടംകുളം ശാസ്താക്കൻമാരുടെയും 11 ന് ഊരകത്തമ്മ തിരുവടിയുടെയും ചാത്തക്കുടം ശാസ്താവിന്റെയും പടിഞ്ഞാറോട്ട്കയറ്റം ഉണ്ടാകും. ഈ സമയം ചേർപ്പ് ഭഗവതിയുടെ എഴുന്നള്ളിപ്പ് മൂന്ന് ഗജവീരൻമാരുടെ അകമ്പടിയോടെ പടിഞ്ഞാറെ നടവഴിയിൽ നിന്ന് ആരംഭിക്കും. ചോറ്റാനിക്കര സുഭാഷ് മാരാരുടെ നേതൃത്വത്തിൽ പഞ്ചവാദ്യം ഉണ്ടാകും. എഴുന്നള്ളിപ്പ് മേക്കാവ് ഭഗവതി ക്ഷേത്ര പരിസരത്ത് എത്തിയാൽ പഞ്ചവാദ്യം സമാപിക്കുകയും തുടർന്ന് കരിമരുന്ന് പ്രയോഗത്തിന് ശേഷം ഏഴ് ഗജവീരൻമാരുടെ അകമ്പടിയോടെ പെരുവനം കുട്ടൻമാരാരുടെ നേതൃത്വത്തിലുള്ള പഞ്ചാരിമേളത്തോടെ എഴുന്നള്ളിപ്പ് ആരംഭിക്കും.

12 ന് പെരുവനം ക്ഷേത്രമതിൽക്കകത്ത് പിടിക്കപറമ്പ് നെട്ടിശേരി, നാങ്കുളം, കോടന്നൂർ, ചിറ്റി ചാത്തക്കുടം മേടംകുളം, കല്ലേലി, മാട്ടിൽ ശാസ്താക്കൻമാരും എടക്കുന്നി, തൈക്കാട്ടശേരി, പൂനിലർക്കാവ് ഭഗവതിമാരും അണി ചേർന്ന് എഴുന്നള്ളിപ്പ് നടക്കും.കിഴക്കൂട്ട് അനിയൻ മാരാർ മേളത്തിന് നേതൃത്വം നൽകും. ഞായറഴ്ച പുലർച്ചെ നാലിന് ചേർപ്പ്, അയ്ക്കുന്ന് ഭഗവതിമാരുടെ എഴുന്നള്ളിപ്പ് കിഴക്കെ നടവഴിയിൽ നടക്കും മേളത്തിനും, പട്ടിണി ശംഖിനും ശേഷം ഇരു ഭഗവതിമാരും തൊടുകുളത്തിൽ ആറാട്ട് നടത്തും തുടർന്ന് ദേവി ദേവൻമാർ ഉപചാരം ചൊല്ലി പിരിയുന്നതോടെ പെരുവനം പൂരത്തിന് സമാപ്തിയാകും.