തിരുവനന്തപുരം: ഒന്നുകിൽ കാനം; അല്ലെങ്കിൽ സി. ദിവാകരൻ. ലോക്‌സഭാ തിരഞ്ഞെടുപ്പിനുള്ള സി.പി.ഐ സ്ഥാനാർത്ഥി സാദ്ധ്യതാ പാനൽ തയ്യാറാക്കാൻ ചേർന്ന പാർട്ടി തിരുവനന്തപുരം ജില്ലാ കൗൺസിൽ യോഗത്തിൽ ഇന്നലെ ഇതായിരുന്നു വികാരം.

സംസ്ഥാന സെക്രട്ടറി കാനം രാജേന്ദ്രന്റെ പേരിനു തന്നെയാണ് തലസ്ഥാനത്ത് മുൻതൂക്കം. അദ്ദേഹം മത്സരിക്കുന്നില്ലെങ്കിൽ മണ്ഡലം തിരിച്ചുപിടിക്കാൻ നെടുമങ്ങാട് എം.എൽ.എയും പാർട്ടി സംസ്ഥാന നിർവാഹക സമിതി അംഗവുമായ സി.ദിവാകരനെ ഇറക്കണം. കൗൺസിൽ യോഗം ഒടുവിൽ ജില്ലാ സെക്രട്ടറി ജി.ആർ. അനിലിന്റെ പേരു കൂടി ചേർത്ത് മൂന്നംഗ സാദ്ധ്യതാ പാനൽ തയ്യാറാക്കി.

മാവേലിക്കര മണ്ഡലത്തിലേക്ക് കൊല്ലം, കോട്ടയം, ആലപ്പുഴ ജില്ലാ കൗൺസിലുകൾ അടൂർ എം.എൽ.എ ചിറ്റയം ഗോപകുമാറിന്റെ പേര് ഒരുപോലെ നിർദ്ദേശിച്ചതോടെ അദ്ദേഹം തന്നെ സ്ഥാനാർത്ഥിയാകുമെന്ന് കരുതാം. . തൃശൂരിലേക്ക് ജില്ലാ കൗൺസിൽ യോഗം അംഗീകരിച്ച ആദ്യ പേര് സിറ്റിംഗ് എം.പി സി.എൻ. ജയദേവന്റേതാണ്. മന്ത്രി വി.എസ്. സുനിൽകുമാറിന്റെ പേര് ചർച്ചയിൽ വന്നെങ്കിലും അദ്ദേഹം ഒഴിഞ്ഞു.

വയനാട് മണ്ഡലത്തിലേക്ക് പാർട്ടി സംസ്ഥാന അസിസ്റ്റന്റ് സെക്രട്ടറി സത്യൻ മൊകേരിക്ക് വയനാട് ജില്ലാ കൗൺസിൽ മുൻതൂക്കം നൽകിയപ്പോൾ, മലപ്പുറം ജില്ലാ കൗൺസിലിൽ മുൻ ജില്ലാ സെക്രട്ടറിയും സംസ്ഥാന നിർവ്വാഹകസമിതി അംഗവുമായ പി.പി. സുനീറിനാണ് മുൻതൂക്കം. സത്യൻ മൊകേരിയുടെ പേര് രണ്ടാമതായി ഉൾപ്പെടുത്തിയിട്ടുണ്ട്. കോഴിക്കോട് ജില്ലാ കൗൺസിൽ ഇന്നു ചേർന്ന് പട്ടിക തയ്യാറാക്കും.

നാളെ സംസ്ഥാന എക്സിക്യുട്ടീവും തിങ്കളാഴ്ച സംസ്ഥാന കൗൺസിലും ജില്ലാ ഘടകങ്ങളുടെ സാദ്ധ്യതാപാനൽ ചർച്ച ചെയ്ത് ധാരണയുണ്ടാക്കി ദേശീയ കൗൺസിലിനു കൈമാറും. ദേശീയ കൗൺസിൽ യോഗമാണ് അന്തിമമായി സ്ഥാനാർത്ഥികളെ പ്രഖ്യാപിക്കുക.

ജില്ലാ കൗൺസിലുകളുടെ

സാദ്ധ്യതാ പാനൽ

തിരുവനന്തപുരം

കാനം രാജേന്ദ്രൻ, സി. ദിവാകരൻ, ജി.ആർ. അനിൽ.

 കൊല്ലം (മാവേലിക്കര)

ചിറ്റയം ഗോപകുമാർ, ജില്ലാ എക്സിക്യൂട്ടീവ് അംഗം ആർ.എസ്. അനിൽ, ജില്ലാ കൗൺസിൽ അംഗം ദിനേശ് ബാബു.

 ആലപ്പുഴ (മാവേലിക്കര)

ചിറ്റയം ഗോപകുമാർ, ഡെപ്യൂട്ടി സ്പീക്കർ വി. ശശി, എ.ഐ.വൈ.എഫ് ജില്ലാ പ്രസിഡന്റ് വി.എ. അരുൺകുമാർ (കായംകുളം)

 കോട്ടയം (മാവേലിക്കര)

ചിറ്റയം ഗോപകുമാർ, വൈക്കം മുൻ എം,എൽ.എ കെ. അജിത്, എലിക്കുളം ജയകുമാർ (യുവകലാസാഹിതി)

 തൃശൂർ

സി.എൻ. ജയദേവൻ എം.പി, കെ.പി. രാജേന്ദ്രൻ, രാജാജി മാത്യു തോമസ്.

 വയനാട്

സത്യൻ മൊകേരി, സി.എൻ. ചന്ദ്രൻ, പി.പി. സുനീർ.

 മലപ്പുറം (വയനാട്)

പി.പി. സുനീർ, സത്യൻ മൊകേരി, മുൻ ഡെപ്യൂട്ടി സ്പീക്കർ ജോസ് ബേബി

 കോഴിക്കോട് (വയനാട്)

പാനൽ ആയില്ല. ജില്ലാ കൗൺസിൽ ഇന്നു ചേരും.