കല്ലമ്പലം: ബൈക്ക് യാത്രക്കാരനെ തടഞ്ഞു നിറുത്തി അഞ്ചംഗ സംഘം പണം കവർന്ന കേസിൽ ഒളിവിലായിരുന്ന പ്രതി പിടിയിൽ. നടയറ സംസം നഗർ തൈക്കാവിന് സമീപം നഹാസ് മൻസിലിൽ ബഷീർ മകൻ തക്കു എന്ന് വിളിക്കുന്ന നഹാസ് ( 31) ആണ് അറസ്റ്റിലായത് അഞ്ച് മാസങ്ങൾക്ക് മുമ്പ് കല്ലമ്പലം മാവിൻമൂടു വച്ച് ബൈക്ക് യാത്രക്കാരനെ ആക്രമിച്ച് 40000 രൂപ തട്ടിയെടുത്ത കേസിലെ പ്രതിയാണ് ഇയാൾ. സംഭവശേഷം ഒളിവിലായിരുന്ന പ്രതിയെ കല്ലമ്പലം പൊലീസ് സബ് ഇൻസ്പെക്ടർ പി. അഭിലാഷിന്റെ നേതൃത്വത്തിലുള്ള സംഘമാണ് കഴിഞ്ഞ ദിവസം അറസ്റ്റു ചെയ്തത്. ഈ കേസിലെ മറ്റ് പ്രതികളായ ചില്ലു എന്ന് വിളിക്കുന്ന വിഷ്ണു, സന്തു കൃഷ്ണൻ, ജിജിൻ, വിഷ്ണു എന്നിവരെ നേരത്തെ തന്നെ അറസ്റ്റ് ചെയ്തിരുന്നു. ഇതോടെ ഈ കേസിൽ ഉൾപ്പെട്ട മുഴുവൻ പ്രതികളും അറസ്റ്റിലായെന്ന് കല്ലമ്പലം പൊലീസ് അറിയിച്ചു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.