നെടുമ്പാശേരി: കൊച്ചി രാജ്യാന്തര വിമാനത്താവളത്തിൽ കാമുകിയെ യാത്രയാക്കാൻ പർദ്ദയണിയുമ്പോൾ യുവാവ് പിടിയിലായി. കഴിഞ്ഞ ദിവസം തൃശൂർ സ്വദേശിയായ യുവാവാണ് വിമാനത്താവളത്തിലെ സുരക്ഷ ഉദ്യോഗസ്ഥരുടെ പിടിയിലായത്. തൃശൂർ സ്വദേശിനിയായ 23കാരി എമിറേറ്റ്സ് വിമാനത്തിൽ ദുബായിലേക്ക് പോകാനെത്തി.

യാത്രയാക്കാൻ രക്ഷിതാക്കളും എത്തിയിരുന്നു. കാമുകിയെ യാത്രയാക്കാൻ രഹസ്യമായി വിമാനത്താവളത്തിലെത്തിയ കാമുകൻ പാർക്കിംഗ് ഏരിയയിൽ നിന്നും പർദ്ദയണിയുന്നത് സമീപമുണ്ടായിരുന്ന ഡ്രൈവർമാരുടെ ശ്രദ്ധയിൽപ്പെട്ടു. ഇവർ വിവരം സി.ഐ.എസ്.എഫിന് കൈമാറി. കാറിൽ നിന്നും പർദ്ദയണിഞ്ഞ് പുറത്തിറങ്ങിയതോടെ സി.ഐ.എസ്.എഫ് വന്ന് കൈയ്യോടെ പിടികൂടി.

തുടർന്ന് ചോദ്യം ചെയ്തപ്പോഴാണ് വിവരമറിയുന്നത്. പെൺകുട്ടിയുടെ വീട്ടുകാരെ ബന്ധപ്പെട്ട് വിവരം തിരക്കിയപ്പോൾ പറഞ്ഞത് ശരിയാണെന്ന് ബോധ്യമായി. എന്നാൽ ഇയാൾക്കെതിരെ പരാതി നൽകാൻ ഇവർ തയ്യാറാകാത്തതിനാൽ പൊലീസിന് കൈമാറാനോ കേസെടുക്കാനോ കഴിഞ്ഞില്ല. പിന്നീട് യുവാവിനെ താക്കീത് നൽകി വിട്ടയച്ചു.