തിരുവനന്തപുരം: എൻ.സി.ആർ.ടിയുടെ ഒമ്പതാം ക്ലാസിലെ ചരിത്രപാഠപുസ്തകത്തിൽ നിന്നും നവോത്ഥാന മുന്നേറ്റങ്ങളെ ഒഴിവാക്കിയ നടപടി അങ്ങേയറ്റം അപലപനീയമാണെന്ന് മുഖ്യമന്ത്രി പിണറായി വിജയൻ പറഞ്ഞു. ചരിത്ര പുസ്തകങ്ങളെ തെറ്റായ രീതിയിൽ മാറ്റിയെഴുതുന്ന സംഘപരിവാർ കാഴ്ചപ്പാടുകൾ പ്രതിഫലിപ്പിക്കുന്നതാണ് ഈ നടപടി.

നവോത്ഥാന മുന്നേറ്റങ്ങളെയും ഇന്ത്യയിലെ ദളിത് പിന്നാക്ക വിഭാഗങ്ങൾ നടത്തിയ പോരാട്ടങ്ങളുമാണ് ഒഴിവാക്കിയത്. കേരളത്തിന്റെ നവോത്ഥാന ചരിത്രത്തിലെ സുപ്രധാനമായ മാറുമറയ്ക്കൽ സമരവും ഒഴിവാക്കിയിരിക്കുകയാണ്. അക്കാലത്തെ സാമൂഹ്യനീതിയുടെ പൊള്ളത്തരങ്ങളെ തുറന്നുകാട്ടുന്ന പുസ്തകമാണ് സി.കേശവന്റെ ജീവിതസമരം എന്ന ആത്മകഥ. അതിലെ ഭാഗങ്ങളും ഒഴിവാക്കി. രാജ്യത്തിലെ ദളിതരും പിന്നാക്ക വിഭാഗങ്ങളും നടത്തിയ സമരങ്ങളെ ബോധപൂർവം തമസ്കരിക്കുന്ന നടപടിയാണ് ഇത്. നവോത്ഥാന മൂല്യങ്ങളെ പാഠപുസ്തകത്തിൽ കൂടുതലായി ഉൾപ്പെടുത്തി സമത്വത്തിന്റെ ആശയങ്ങൾ പ്രചരിപ്പിക്കാൻ സംസ്ഥാന സർക്കാർ ശ്രമിക്കുന്ന ഘട്ടത്തിലാണ് ഈ നടപടിയെന്നും അദ്ദേഹം പറഞ്ഞു.