തിരുവനന്തപുരം: പൊലീസ് മേധാവി ലോക്നാഥ് ബെഹ്റയെ അധിക്ഷേപിച്ച് ഉദ്യോഗസ്ഥരുടെ വാട്സ് ആപ് ഗ്രൂപ്പിൽ പോസ്റ്റിട്ട പൊലീസ് അസോസിയേഷൻ ജില്ലാ പ്രസിഡന്റ് രാധാകൃഷ്‌ണനെതിരെ അന്വേഷണത്തിന് ഉത്തരവ്. ഹെഡ്ക്വാർട്ടേഴ്സ് ഐ.ജി ദിനേന്ദ്ര കശ്യപിനാണ് അന്വേഷണച്ചുമതല. നേതാവിൽ നിന്ന് ആദ്യം വിശദീകരണം തേടും. പിന്നീട് വിളിച്ചുവരുത്തി മൊഴിയെടുക്കും. സൈബർ വിഭാഗത്തിന്റെ സഹായത്തോടെ അന്വേഷണം നടത്താനാണ് ഐ.ജിക്കുള്ള നിർദ്ദേശം. എസ്.ഐ റാങ്കിലുള്ള നേതാവിന്റെ ഭാഗത്തുനിന്ന് ഗുരുതരമായ അച്ചടക്ക ലംഘനമാണ് ഉണ്ടായതെന്നാണ് പൊലീസ് ആസ്ഥാനത്തിന്റെ വിലയിരുത്തൽ.

പൊലീസ് ബറ്റാലിയനുകളിൽ നിലനിന്ന 673 താത്കാലിക പ്രൊമോഷൻ തസ്തികകൾ ഇല്ലാതാക്കാൻ, തിരഞ്ഞെടുപ്പിന്റെ മറവിൽ പൊലീസ് മേധാവി സൂത്രപ്പണി നടത്തിയെന്നാണ് നാലാം ബറ്റാലിയനിലെ ഓഫീസർമാരുടെ വാട്സ്ആപ് ഗ്രൂപ്പിൽ രാധാകൃഷ്‌ണൻ പോസ്റ്റിട്ടത്.