തിരുവനന്തപുരം: സംസ്ഥാനത്തിന്റെ വിവിധ ഭാഗങ്ങളിൽ ഇന്നലെ മൂന്ന് പേരാണ് സൂര്യാഘാതത്തെ തുടർന്ന് മരിച്ചത്.

സ്വന്തം കൃഷിയിടത്തിൽജോലി ചെയ്തുകൊണ്ടിരിക്കവെയാണ് പാറശാലയ്ക്ക് സമീപം നെയ്യാറ്റിൻകര അഡീഷണൽ ജില്ലാ സെഷൻസ് കോടതിയിലെ ബെഞ്ച് ക്ലാർക്ക് അയിര ഞാറക്കാല പെരിങ്ങാ ആവണിയിൽ കരുണാകരൻ (44) മരിച്ചത്.

കണ്ണൂരിൽ മാതമംഗലം വെള്ളോറയിൽ വിജനമായ സ്ഥലത്താണ് ചെക്കിക്കുണ്ട് സ്വദേശി കെ.നാരായണനെ (71) മരിച്ച നിലയിൽ കണ്ടെത്തിയത്. പത്തനംതിട്ട കോഴഞ്ചേരിയിൽ

ഹോട്ടൽതൊഴിലാളിയായ നാരങ്ങാനം ലക്ഷംവീട് കോളനിയിൽ ഷാജഹാനെ (60) ഇന്നലെ വൈകിട്ട് മൂന്ന് ഓടെയാണ് മാരാമൺ ബിഷപ്പ് ഹൗസിന് മുമ്പിലെ റോഡിൽ അവശനിലയിൽ കണ്ടെത്തിയത്. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

ഇന്നലെ ഉച്ചയ്ക്ക് 12 ഓടെയാണ് പാറശാല വാവ്വക്കരയിലെ വയലിൽ അബോധാവസ്ഥയിൽ കണ്ടെത്തിയ കരുണാകരനെ ഉടൻ നാട്ടുകാർ പാറശാല താലൂക്ക് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ശരീരത്തിൽ പലഭാഗത്തും വെയിലേറ്റ് പൊള്ളിയ പാടുണ്ട്.ചുമലിലും പുറത്തും തൊലി പൊളിഞ്ഞ് ഇളകിയ നിലയിലാണ്. സൂര്യാഘാതമാണ് മരണകാരണമെന്നാണ് പ്രാഥമിക നിഗമനമെങ്കിലും പോസ്റ്റ്മോർട്ടം റിപ്പോർട്ടിന് ശേഷമേ ഇക്കാര്യം വ്യക്തമാകൂയെന്ന് പൊലീസ് പറഞ്ഞു.

കരുണാകരന്റെ ഭാര്യ സുമി പട്ടം പി.എസ്.സി ഓഫീസിലെ ജീവനക്കാരിയാണ്. കൊറ്റാമം ഫാത്തിമാ പബ്ലിക് സ്കൂളിലെ എട്ടാം ക്ലാസ് വിദ്യാർത്ഥിയായ അക്ഷയ് , ആറാം ക്ലാസ് വിദ്യാർത്ഥിയായ അഭിഷേക് എന്നിവർ മക്കളാണ്.പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുകൊടുത്ത മൃതദേഹം വൈകിട്ടോടെ വീട്ടുവളപ്പിൽ സംസ്കരിച്ചു.

ശനിയാഴ്ച രാവിലെ വെള്ളോറ ടൗണിലേക്ക് പോയ നാരായണൻ

രാത്രിയായിട്ടും തിരിച്ചെത്തിയിരുന്നില്ല. തുടർന്ന് ഞായറാഴ്ച രാവിലെ തെരച്ചിലിലാണ് വിജനമായ സ്ഥലത്ത് മൃതദേഹം കണ്ടെത്തിയത്. കൈകാലുകളിലും മറ്റും പൊള്ളലേറ്റ അടയാളങ്ങൾ കണ്ടതിനാൽ സൂര്യാഘാതമാണ് മരണകാരണമെന്നാണ് നിഗമനം. എന്നാൽ ശ്വാസതടസമാണ് മരണകാരണമെന്ന് പരിയാരം മെഡിക്കൽ കോളേജിൽ നടത്തിയ പോസ്റ്റുമോർട്ടത്തിൽ പറയുന്നത്.സൂര്യാഘാതത്തെ തുടർന്ന് ശ്വാസതടസമുണ്ടായതാകാമെന്നും ഡോക്ടർമാർ പറയുന്നു.ജാനകിയാണ് നാരായണന്റെ ഭാര്യ:മക്കൾ: മധുസൂദനൻ , ഷാജി. മരുമക്കൾ: ശോഭന , സവിത .

കർഷകത്തൊഴിലാളികൾ ആശങ്കയിൽ

തിരുവനന്തപുരം:സംസ്ഥാനത്ത് സൂര്യാഘാതവും ഉഷ്ണതരംഗവും വരെയുണ്ടാകുമെന്ന മുന്നറിയിപ്പുകളൊന്നും ഭൂവുടമകൾ കാര്യമായെടുക്കാത്തതിൽ കർഷക തൊഴിലാളികൾക്ക് ആശങ്ക. ജോലിസമയം പരിഷ്ക്കരിക്കണമെന്ന ലേബർ കമ്മിഷണറുടെ നിർദ്ദേശവും ആരും അറിഞ്ഞ മട്ടില്ല.

പച്ചക്കറിയുടെ വിളവെടുപ്പും ഒാണം ലക്ഷ്യമാക്കിയുള്ള പുതിയ കൃഷിയിറക്കലും വാഴത്തൈനടീലുമെല്ലാം മുറയ്‌ക്ക് നടക്കുന്നുണ്ട്. രാവിലെ ആറുമുതൽ പത്തുവരെയാക്കി ജോലിസമയം മാറ്റണമെന്ന് പറഞ്ഞിട്ടുണ്ടെങ്കിലും ആരും വകവെയ്ക്കുന്നില്ല. നാട്ടുകാരായ പണിക്കാരെ കിട്ടിയില്ലെങ്കിൽ പുറം പണിക്കാരായ ബംഗാളികളെയും ആസാമികളെയും പണിക്ക് കയറ്റും. അവർക്കാണെങ്കിൽ സൂര്യാഘാതവും ചൂടുമൊന്നും പ്രശ്നവുമല്ല.

സാധാരണ വേനൽക്കാലത്ത് കർഷകർ രാവിലെ 7നു മുമ്പ് പാടത്തെത്തുകയും പത്തിനു മുമ്പ് ജോലി തീർക്കുകയുമാണ് ചെയ്യുന്നത്. പിന്നെ വൈകിട്ട് നാലിനു മാത്രം ജോലി ചെയ്യും. വേനൽ കനത്തിനാൽ വയലുകളിലെ വെള്ളച്ചാലുകൾ വരണ്ടു തുടങ്ങിയതനാൽ വെള്ളം ഉള്ളിടത്തു നിന്ന് കോരിക്കൊണ്ടൊഴിക്കേണ്ടി വരും. അങ്ങിന ചെയ്യുമ്പോൾ 11നു മുമ്പ് തന്നെ ആ ജോലി തീരണമെന്നില്ല. കൂലിക്കു നിൽക്കുന്ന തൊഴിലാളി മാറി നിന്നാലും സ്വന്തം പാടത്ത് ജോലി ചെയ്യുന്ന കർഷൻ സമയം നോക്കാതെ ജോലി ചെയ്യും.

രാവിലെ 11നും വൈകിട്ട് 3നും ഇടയ്ക്ക് ജോലി ചെയ്യാൻ പാടില്ലെന്ന് തൊഴിൽ വകുപ്പും വിലക്കയിട്ടുണ്ടെങ്കിലും പലയിടത്തും വെയിലത്തും കെട്ടിടനിർമ്മാണം ഉൾപ്പെടെയുള്ള ജോലികൾ നടക്കുന്നത് കാണാം. പലപ്പോഴും തൊഴിലാളികൾ തന്നെ ജോലിക്ക് തയ്യാറാകുന്നതാണ് കാരണം. സൂര്യാഘാതത്തെ കുറിച്ചുള്ള ബോധവത്കരണങ്ങളുടെ അഭാവവും ഒരു കാരണമാണ്. ഗ്രാമങ്ങളിൽ മൈക്ക് അനൗൺസ്‌മെന്റു പോലുള്ള പ്രചരണമൊന്നും ഇല്ല. ഇതര സംസ്ഥാന തൊഴിലാളികൾക്കിടയിൽ അവരുടെ ഭാഷയിലുളള ബോധവത്കരണമാണ് വേണ്ടത്. അതും ഇല്ല..