നെടുമ്പാശേരി: ശബരിമലയിൽ ആചാരലംഘനത്തിനെത്തിയ തൃപ്തി ദേശായിയെ കൊച്ചി വിമാനത്താവളത്തിൽ തടഞ്ഞ കേസിൽ ബി.ജെ.പി സംസ്ഥാന ജനറൽ സെക്രട്ടറിയും ചാലക്കുടി ലോക്‌സഭ മണ്ഡലം എൻ.ഡി.എ സ്ഥാനാർത്ഥിയുമായ എ.എൻ. രാധാകൃഷ്ണനെ നെടുമ്പാശേരി പൊലീസ് അറസ്റ്റ് ചെയ്ത് ജാമ്യത്തിൽ വിട്ടു.

ഇന്നലെ ഉച്ചയ്ക്ക് രണ്ട് മണിയോടെ സ്ഥാനാർത്ഥി നെടുമ്പാശേരി സി.ഐ മുമ്പാകെ ഹാജരാകുകയായിരുന്നു. കേസിൽ 161 പ്രതികളുണ്ട്. 70 ഓളം പേരെ അറസ്റ്റ് ചെയ്തു. പത്തനംതിട്ടയിലെ എൻ.ഡി.എ സ്ഥാനാർത്ഥി കെ. സുരേന്ദ്രനും ആറ്റിങ്ങലെ സ്ഥാനാർത്ഥി ശോഭ സുരേന്ദ്രനും നേരത്തേ സ്റ്റേഷനിൽ ഹാജരായി ജാമ്യമെടുത്തിരുന്നു.

അയ്യപ്പജ്യോതി തെളിയിച്ചതും നിലയ്ക്കലിൽ നിരോധനാജ്ഞ ലംഘിച്ചതും ഉൾപ്പടെ ശബരിമല പ്രക്ഷോഭവുമായി ബന്ധപ്പെട്ട അഞ്ച് കേസുകളിലും എ.എൻ രാധാകൃഷ്ണൻ ജാമ്യമെടുത്തു.