ആലുവ: ആലുവയിൽ നിന്ന് അങ്കമാലി, പറവൂർ ഭാഗങ്ങളിലേക്ക് പോകുന്ന കെ.എസ്.ആർ.ടി.സി ബസുകൾ റൂട്ട് തെറ്റിച്ച് സർവീസ് നടത്തി യാത്രക്കാരെ പെരുവഴിയിലാക്കുന്നു. അധി​കാരി​കൾ നടപടിയെടുക്കാത്തതി​നാൽ നരകയാതന തുടരുന്നു. നഗരത്തിലെ പ്രധാന സ്റ്റോപ്പുകളായ സ്വകാര്യ ബസ് സ്റ്റാൻഡ്, ബാങ്ക് കവല, ബൈപ്പാസ് സ്റ്റോപ്പുകൾ ഒഴിവാക്കി മാർക്കറ്റ് ഭാഗത്ത് കാരോത്തുകുഴി കവല കഴിഞ്ഞുള്ള കപ്പേളക്ക് സമീപത്ത് നിന്നും ഇടത്തേക്ക് തിരിഞ്ഞ് ദേശീയപാതയിലേക്ക് ബസ് കടന്നുപോകുന്നതായി​ യാത്രക്കാർ ചൂണ്ടി​ക്കാട്ടുന്നു.

എറണാകുളത്ത് നിന്നുവരുന്ന ബസുകൾക്ക് പുറമെ ആലുവ ഡിപ്പോയിൽ നിന്ന് സർവീസ് ആരംഭിക്കുന്ന ബസുകൾ വരെ ഇത്തരത്തിൽ വഴി മാറ്റി സർവീസ് നടത്തുന്നുണ്ട്.

കെ.എസ്.ആർ.ടി.സി കടുത്ത സാമ്പത്തി​ക പ്രതിസന്ധിയിലൂടെ കടന്നുപോകുമ്പോൾ യാത്രക്കാരെ പെരുവഴിയിലാക്കിയും കോർപ്പറേഷന് സാമ്പത്തി​കനഷ്ടം വരുത്തിയും ഒരു വിഭാഗം ജീവനക്കാർ നടത്തുന്ന ഇത്തരം ജനവി​രുദ്ധ നടപടിക്കെതി​രെ കടുത്ത പ്രതിഷേധം ഉയരുകയാണ്. തൃശൂർ ഭാഗത്തേക്ക് പോകുന്നതിന് ഫാസ്റ്റ് പാസഞ്ചർ ബസുകൾ കത്തുനിൽക്കുന്നവർ പലപ്പോഴും വഞ്ചിതരാകാറുണ്ട്. എറണാകുളത്ത് നിന്നും വരുന്ന കെ.എസ്.ആർ.ടി.സി ബസുകൾ ബൈപ്പാസ്, ബാങ്ക് കവല വഴിയാണ് ആലുവ സ്റ്റാന്റിലേക്ക് പോകുന്നത്. ഈ ബസുകൾ ശ്രദ്ധയിൽപ്പെടുന്ന തൃശൂർ ഭാഗത്തേക്കുള്ള യാത്രക്കാർ ബസ് തിരിച്ച് വരുന്നതും കാത്തുനിന്നാൽ ഇളിഭ്യരാകുമെന്നതാണ് അവസ്ഥ. മാർക്കറ്റ് ഭാഗത്ത് നിന്നും ബസുകൾ മേൽപ്പാലത്തിന് അടിയിലൂടെ നേരിട്ട് ദേശീയപാതയിലേക്ക് പ്രവേശിക്കുകയാണ്.

തിരക്കേറിയ റോഡിൽ നിന്നും എളുപ്പം ദേശീയപാതയിലേക്ക് പ്രവേശിക്കുമ്പോൾ കെ.എസ്.ആർ.ടി.സിക്ക് സമയലാഭവും സാമ്പത്തി​ക ലാഭവുമുണ്ട്. എന്നാൽ കെ.എസ്.ആർ.ടി.സി അധികൃതരുടെ അനുമതിയില്ലാതെ ജീവനക്കാർ സ്വന്തം നിലയിൽ വഴി മാറി ഓടുന്നതാണ്.