മൂവാറ്റുപുഴ: ഇടുക്കി ലോക് സഭാ മണ്ഡലത്തിൽപ്പെട്ട മൂവാറ്റുപുഴ അസംബ്ളി നിയോജക മണ്ഡലത്തിലെ വോട്ടെടുപ്പിനുള്ള ഒരുക്കം പൂർത്തിയായി. 153 ബൂത്തുകളിലേയ്ക്കുള്ള പോളിംഗ് സാമഗ്രികൾ മൂവാറ്റുപുഴ നിർമ്മല ഹയർസെക്കൻഡറി സ്‌കൂളിൽ നിന്ന് പോളിംഗ് ഉദ്യോഗസ്ഥർ ഏറ്റുവാങ്ങി അതാത് പോളിംഗ് സ്റ്റേഷനുകളിൽ എത്തിച്ച് ചുമതല ഏറ്റെടുത്തു. ഒന്ന് മുതൽ അഞ്ച് വരെ പോളിംഗ് ബൂത്തുകളുള്ള 92കേന്ദ്രങ്ങളിലാണ് വോട്ടെടുപ്പ് നടക്കുക. ഇന്നലെ രാവിലെ എത്തിയ ഉദ്യോഗസ്ഥർ തിരഞ്ഞെടുപ്പ് സാമഗ്രികളുമായി രണ്ട് മണിയോടെ വാഹനങ്ങളിൽ ബൂത്തുകളിലേയ്ക്ക് മടങ്ങി. പോളിംഗ് ബൂത്തുകളിൽ റിട്ടേണിംഗ് ഓഫീസർ, മറ്റ് ഉദ്യോഗസ്ഥർ എന്നിവർക്ക് എന്തെങ്കിലും ബുദ്ധിമുട്ട് ഉണ്ടായാൽ പകരം ഉദ്യോഗസ്ഥരെ നിയമിക്കുന്നതിനായി പരിശീലനം ലഭിച്ച മുപ്പതോളം പേരുണ്ട്. സ്ത്രീ സൗഹൃദ ബൂത്തായ നിർമ്മലാ ജൂനിയർ സ്‌കൂളിലെ അമ്പതാം ബൂത്തിൽ വനിതാ ഉദ്യോഗസ്ഥർ ചാർജെടുത്തു.

ജോയ്‌സ് ജോർജ് വാഴത്തോപ്പിലും ഡീൻ കുര്യാക്കോസ് പൈങ്ങോട്ടൂരിലും വോട്ട് ചെയ്യും

മൂവാറ്റുപുഴ: എൽ.ഡി.എഫ് സ്വതന്ത്ര സ്ഥാനാർത്ഥി അഡ്വ. ജോയ്‌സ് ജോർജ് വാഴത്തോപ്പ് മുളകുവള്ളി അംഗൻവാടിയിൽ 88ാം നമ്പർ ബൂത്തിൽ വോട്ട് ചെയ്യും. രാവിലെ 7.30ന് മാതാപിതാക്കളോടും കുടുംബാംഗങ്ങളോടുമൊപ്പം എത്തിയാണ് വോട്ട് രേഖപ്പെടുത്തുക. തുടർന്ന് പാർലമെന്റ് മണ്ഡലത്തിലെ 7 അസംബ്ലി നിയോജക മണ്ഡലങ്ങളിലേയും ബൂത്തുകൾ സന്ദർശിക്കും.

യു.ഡി.എഫ് സ്ഥാനാർത്ഥി ഡീൻ കുര്യാക്കോസ് രാവിലെ ഏഴിന് മൂവാറ്റുപുഴ നിയോജകമണ്ഡലത്തിലെ പൈങ്ങോട്ടൂർ ഗ്രാമപഞ്ചായത്തിലെ കുളപ്പുറം സെന്റ് ജോർജ് എൽപി സ്‌കൂളിളെ 80ാം നമ്പർ ബൂത്തിൽ കുടുംബാംഗങ്ങളോടൊപ്പം വോട്ട് രേഖപ്പെടുത്തും. തുടർന്ന് പാർലമെന്റ് മണ്ഡലത്തിലെ അസംബ്ലി നിയോജക മണ്ഡലങ്ങളിലെയും ബൂത്തുകൾ സന്ദർശിക്കും.

എൽദോ എബ്രഹാം എം.എൽ.എ തൃക്കളത്തൂർ ഗവ. എൽ.പി.ജി സ്‌കൂളിലും മുൻഎം.പി ഫ്രാൻസിസ് ജോർജ് മൂവാറ്റുപുഴ ഗവ. ടൗൺ യു.പി സ്‌കൂളിലും മുൻഎം.എൽ.എമാരായ ഗോപി കോട്ടമുറിക്കൽ നിർമ്മല ഹയർസെക്കൻഡറി സ്‌കൂളിലും ബാബു പോൾ തൃക്കളത്തൂർ ഗവ എൽ.പി.ജി.സ്‌കൂളിലും ജോണി നെല്ലൂർ ഗവ. മോഡൽ ഹൈസ്‌കൂളിലും ജോസഫ് വാഴയ്ക്കൻ നിർമ്മല ജൂനിയർ സ്‌കൂളിലും വോട്ട് രേഖപ്പെടുത്തും.

...