കോലഞ്ചേരി: വോട്ടു ചെയ്തതായി തിരിച്ചറിയാൻ മഷിയടയാളം കൈയിൽ വീഴും മുമ്പ് ഓരോ വോട്ടറും അറിയുന്നുണ്ടോ നിർബന്ധമായും പാലിക്കേണ്ട ഒരു പ്രതിജ്ഞാ വാചകം മഷിക്കവറിനു മുകളിലുണ്ടെന്ന്. തിരഞ്ഞെടുപ്പ് കമ്മീഷന്റെ നിർദ്ദേശ പ്രകാരം മഷി നിർമ്മിച്ചു നല്കുന്ന മൈസൂർ പെയിന്റ്സ് ആന്റ് വാർണീഷിങ്ങ് കമ്പനിയാണ് പ്രതിജ്ഞാ വാചകം കവറിനു മുകളിൽ പ്രിന്റ് ചെയ്തിരിക്കുന്നത്. " ടു കാസ്റ്റ് വോട്ട്, ഐ ഷാൽ നോട്ട് ബീ ബ്രൈബ്ഡ് ഓർ കറപ്റ്റഡ് ഇൻ എനി മാനർ, ദെ ആർ ഡെയ്ഞ്ചറസ് ടു ഔർ നേഷൻ എന്ന് ഇംഗ്ലീഷിലാണ് പ്രതിജ്ഞാ വാചകം പ്രിന്റ് ചെയ്തിരിക്കുന്നത്. വോട്ടു ചെയ്യാൻ ഒരു തരത്തിലുള്ള അഴിമതിക്കും താൻ വഴിപ്പെടില്ലെന്നും അത് രാജ്യത്തിന് അപകടകരമെന്നുമാണ് സാരം. വോട്ടർമാർ കവർ കാണാത്തതു കൊണ്ട് പ്രതിജ്ഞയും കാണാറില്ല. എന്നിരുന്നാലും വോട്ടിന് വേണ്ടി ഒരു സ്വാധീനമില്ലാതെയാണ് വോട്ടു ചെയ്തതെന്ന് ഓരോ പൗരനും ഈ പ്രതിജ്ഞയിലൂടെ അറിഞ്ഞോ അറിയാതയോ വെളിപ്പെടുത്തുകയാണ്. ഏഴു ഘട്ടങ്ങളിലായി നടക്കുന്ന തിരഞ്ഞെടുപ്പിൽ രാജ്യത്തെ പത്ത് ലക്ഷം ബൂത്തുകളിലേയ്ക്ക് 26 ലക്ഷം ബോട്ടിൽ മഷിയാണ് ലഭ്യമാക്കിയിരിക്കുന്നത്. മഷിയ്ക്ക് മാത്രമായി 33 കോടി രൂപയാണ് ചെലവ്. കർണ്ണാടക സർക്കാരിന് കീഴിലുള്ളതാണീ കമ്പനി.