വെള്ളാവ് (കണ്ണൂർ): ക്ഷേമ പെൻഷനുകൾ വാങ്ങുന്നവർ പിണറായി സർക്കാരിന് വോട്ട് ചെയ്തില്ലെങ്കിൽ ദൈവം ചോദിക്കുമെന്ന് ദേവസ്വം മന്ത്രി കടകംപള്ളി സുരേന്ദ്രൻ പറഞ്ഞു. ഇക്കാര്യം പെൻഷൻ വാങ്ങുന്നവരോട് വോട്ടർമാർ പറയണമെന്നും ആവശ്യപ്പെട്ടു. കണ്ണൂരിലെ വെള്ളാവിൽ തിരഞ്ഞെടുപ്പ് റാലിയിൽ സംസാരിക്കുകയായിരുന്നു മന്ത്രി.

കടകംപള്ളിയുടെ വാക്കുകൾ ഇങ്ങനെ: 'ക്ഷേമ പെൻഷനുകൾ വാങ്ങുന്നവർ സർക്കാരിന് വോട്ട് ചെയ്തില്ലെങ്കിൽ ദൈവം ചോദിക്കും അതിൽ ഒരു സംശയവും വേണ്ട. 600 രൂപ 1200 രൂപയാക്കി പെൻഷൻ വീട്ടിൽ കൃത്യമായി എത്തിക്കുന്ന പിണറായി വിജയന് വോട്ട് കൊടുക്കണമെന്ന് നിങ്ങൾ പറയണം. പെൻഷൻ വാങ്ങിയിട്ട് വോട്ട് ചെയ്തില്ലെങ്കിൽ ഇതെല്ലാം കണ്ടുകൊണ്ട് മുകളിൽ ഒരാൾ ഉണ്ടെന്നും തീർച്ചയായും ചോദിച്ചിരിക്കുമെന്നും നമുക്ക് പറയാൻ സാധിക്കണം. നമ്മൾ പറഞ്ഞില്ലെങ്കിൽ ബി.ജെ.പിക്കാരും കോൺഗ്രസുകാരും മറ്റെന്തെങ്കിലും പറഞ്ഞ് പാവങ്ങളെ പറ്റിക്കും."