വൈക്കം : പോളശ്ശേരി ഭഗവതി ക്ഷേത്രത്തിലെ മീനഭരണി മഹോത്സവത്തിന് തന്ത്രി വടശ്ശേരിമന പരമേശ്വരൻ നമ്പൂതിരി കൊടിയേറ്റി. മേൽശാന്തി ആർ. ഗിരീഷ് സഹകാർമ്മികനായി. കൊടിയേറ്റിന് ശേഷം ചുറ്റുവിളക്ക് നടത്തി. തിരുവരങ്ങിൽ കലാപരിപാടികൾക്ക് ദേവസ്വം പ്രസിഡന്റ് കെ. എൻ. രാജേന്ദ്രൻ ദീപം തെളിയിച്ചു. ഉച്ചയ്ക്ക് പ്രസാദമൂട്ടും, വൈകിട്ട് ദേശതാലപ്പൊലിയും നടന്നു. ക്ഷേത്രം പ്രസിഡന്റ് കെ.എൻ.രാജേന്ദ്രൻ, വൈസ് പ്രസിഡന്റ് കെ. വി. ബാലചന്ദ്രൻ, സെക്രട്ടറി വി. എം. രാജേഷ്, ഒ. എ. വിജീവ്, കെ.എൻ.സന്തോഷ്, മഹിളാസഭ പ്രസിഡന്റ് ഗീതാ മനോൻമണി, സെക്രട്ടറി പത്മ കരുണാകരൻ, സീമ ഗിരീഷ് എന്നിവർ നേതൃത്വം നൽകി.
ഉത്സവത്തോടനുബന്ധിച്ചുള്ള വടക്കുപുറത്ത് കളംപാട്ട് 5 ന് നടക്കും. രാവിലെ 9 ന് ഉച്ചപ്പാട്ടോടുകൂടി കളമെഴുത്ത് തുടങ്ങും. വൈകിട്ട് 5 ന് സർവ്വവിധ അലങ്കാരങ്ങളോടുകൂടി കളം പൂർത്തിയാകും. ആചാര്യൻ തേരൊഴി രാമക്കുറുപ്പിന്റെ നേതൃത്വത്തിലാണ് കളമെഴുത്തുംപാട്ടും. 8 നാണ് മീനഭരണി ഉത്സവം. രാവിലെ ശ്രീബലി, കലശാഭിഷേകം, വൈകിട്ട് കുംഭകലശാഭിഷേകം, താലപ്പൊലി, പൂമൂടൽ, രാത്രി 1 ന് വലിയകാണിക്ക, പുലർച്ചെ 2 ന് ഗരുഡൻതൂക്കം, 5 ന് ആറാട്ട് എന്നിവയും നടക്കും. 9 ന് രാവിലെ 7 ന് കലശാഭിഷേകവും 10 ന് വലിയഗുരുതിയും നടക്കും.