തിരുവനന്തപുരം: സമൂഹമാദ്ധ്യമങ്ങളിലൂടെ പ്രായപൂർത്തിയാകാത്ത കുട്ടികളുടെ അശ്ലീല ദൃശ്യങ്ങൾ പ്രചരിപ്പിക്കുന്നവർ സൂക്ഷിച്ചോളൂ, ഓപ്പറേഷൻ പി-ഹണ്ടുമായി കേരള പൊലീസ് പിന്നാലെയുണ്ട്. കുട്ടികളുടെ നഗ്നദൃശ്യങ്ങളും ചിത്രങ്ങളും പ്രചരിപ്പിക്കുന്ന സംഘം പിടിയിലായി. എ.ഡി.ജി.പി മനോജ് എബ്രഹാമിന്റെ നേതൃത്തിലാണ് റെയ്‍ഡ് നടത്തുന്നത്.
കുട്ടികളുടെ നഗ്ന ദൃശ്യങ്ങൾ തുടർച്ചയായി സമൂഹമാദ്ധ്യമങ്ങളിൽ പ്രചരിപ്പിച്ച 12പേരെയാണ് പൊലീസ് ഓപ്പറേഷൻ പി-ഹണ്ടിലൂടെ പിടികൂടിയത്. പതിനെട്ട് വയസ്സിന് താഴെയുള്ള കുട്ടികളുടെ അശ്ലീല വീഡിയോകൾ പ്രചരിക്കുന്നതു തടയുന്നതിനായി സൈബർഡോം ആരംഭിച്ച 'ഓപ്പറേഷൻ പി-ഹണ്ടി'ന്റെ റെയ്‍ഡിലാണ് പ്രതികൾ പിടിയിലായത്. ആൺകുട്ടികളുടെയും പെൺകുട്ടികളുടെയും നിരവധി നഗ്ന ചിത്രങ്ങളാണ് ഇവർ പ്രചരിപ്പിച്ചിട്ടുണ്ട്.
ഇന്റർപോളിന്റെ മുന്നറിയിപ്പിനെ തുടർന്ന് നടത്തിയ റെയ്‍ഡിൽ ഇതുവരെ 16കേസുകളാണ് രജിസ്റ്റർ ചെയ്തത്. സമൂഹമാധ്യമങ്ങളിൽ പേജുകൾ വഴിയും വാട്സ് ആപ്പ്, ടെലഗ്രാം അക്കൗണ്ടുകളും ഗ്രൂപ്പുകളും ഉണ്ടാക്കിയാണ് ഇവർ ചിത്രങ്ങൾ പ്രചരിപ്പിക്കുന്നത്. 84 വ്യക്തികളെക്കുറിച്ചുള്ള വിവരം പൊലീസിന് ലഭിച്ചിരുന്നു. ഇവരുടെ വീടുകളിലും ഓഫീസിലുമാണ് പൊലീസ് റെയ്‍ഡ് നടത്തിയത്.
പിടിയിലായവരുടെ ഫോണിൽ നിന്നും ലാപ് ടോപ്പിൽ നിന്നും ചെറിയ കുട്ടികളുടെ നിരവധി നഗ്ന ദൃശ്യങ്ങളും വീഡിയോകളും പൊലീസ് കണ്ടെടുത്തിട്ടുണ്ട്. സംസ്ഥാന വ്യാപകമായി 'ഓപ്പറേഷന്‍ പി-ഹണ്ടി'ന്റെ പരിശോധനകൾ തുടരുകയാണ്. കുട്ടികളുടെ നഗ്ന ഫോട്ടോയും വീഡിയോയും പ്രചരിപ്പിക്കുന്ന സൈറ്റുകളിലും പരിശോധന നടത്തുന്നുണ്ട്.