വയനാട്: വയനാട് മണ്ഡലത്തിൽ യു,​ഡി.എഫ് സ്ഥാനാർത്ഥിയായി കോൺഗ്രസ് അദ്ധ്യക്ഷൻ രാഹുൽ ഗാന്ധി ഇന്ന് നാമനിർദ്ദേശ പത്രിക സമർപ്പിച്ചു. എൽ.ഡി.എഫ് സ്ഥാനാ‍ർത്ഥി സി.പി.ഐയുടെ പി.പി.സുനീറും എൻ.ഡി.എ സ്ഥാനാർത്ഥി ബി.ഡി.ജെ.എസിന്റെ തുഷാർ വെള്ളാപ്പള്ളിയുമാണ് രാഹുൽ ഗാന്ധിയുടെ പ്രമുഖ എതിർ സ്ഥാനാർത്ഥികൾ. എന്നാൽ നാമനിർദ്ദേശ പത്രിക സമർപ്പണം പൂർത്തിയായതിന് പിന്നാലെ രാഹുൽ ഗാന്ധിക്ക് ഭീഷണിയായി രണ്ട് അപരൻമാരും രംഗത്തെത്തി.

എരുമേലി സ്വദേശി രാഹുൽ ഗാന്ധി കെ.ഇ,​ തമിഴ്നാട് സ്വദേശി രാകുൽ ഗാന്ധി എന്നിവരാണ് വയനാട്ടിൽ നാമനിർദ്ദേശ പത്രിക സമർപ്പിച്ച അപരൻമാർ. സ്ഥാനാർത്ഥികളുടെ പേരിൽ അപരൻമാരെ രംഗത്തിറക്കുന്നത് തിരഞ്ഞെടുപ്പ് കാലത്ത് പതിവാണെങ്കിലും രാഹുൽ ഗാന്ധിയുടെ പേരിനോട് ഇത്രയും സാദൃശ്യമുള്ള അപരൻമാരെ രംഗത്തിറക്കിയതിന് പിന്നിൽ ബി.ജെ.പിയാണെന്നാണ് ആരോപണം.