തിരുവനന്തപുരം : കൺസ്യൂമർഫെഡും, ബിവറേജസ് കോർപ്പറേഷനും വിറ്റഴിക്കുന്ന മദ്യം വാങ്ങിക്കഴിക്കുന്നവരെ പൊലീസ് അകാരണമായി അറസ്റ്റ് ചെയ്യുന്നുവെന്ന് മദ്യപാനികൾ പലപ്പോഴും പറയുന്ന പരാതിയാണ്. ഈ പരാതിയുമായി തിരുവനന്തപുരം സ്വദേശി സുരേഷ് ബാബു നേരെ പോയത് മനുഷ്യാവകാശ കമ്മീഷനിലേക്കാണ്. തലസ്ഥാനത്തെ ഫോർട്ട് സബ്ഡിവിഷന് കീഴിൽ വരുന്ന നേമം പൊലീസ് സ്റ്റേഷനിലെ ഉദ്യോഗസ്ഥരെയാണ് പ്രധാനമായും പരാതിയിൽ കുറ്റപ്പെടുത്തിയത്. പരാതി പരിഗണിച്ചപ്പോൾ മദ്യപിച്ച് പൊതുസ്ഥലങ്ങളിൽ പ്രശ്നം ഉണ്ടാക്കുന്നവർക്ക് എതിരെയും പൊതുസ്ഥലങ്ങളിൽ മദ്യപിക്കുന്നവർക്ക് എതിരെയും മാത്രമാണ് നടപടിയെടുക്കുന്നതെന്നായി പൊലീസ് ഭാഷ്യം. തുടർന്ന് മദ്യപരെ തോന്നും പോലെ അറസ്റ്റ് ചെയ്യരുതെന്ന് പൊലീസ് മേധാവിയോട് മനുഷ്യാവകാശ കമ്മീഷൻ നിർദേശിച്ചു.

ഇത് അനുസരിച്ച് മദ്യപിച്ചെന്ന കാരണത്താൽ ആരെയും അറസ്റ്റ് ചെയ്യരുതെന്ന് പൊലീസ് കമ്മിഷണർ സർക്കുലർ ഇറക്കിയിരിക്കുകയാണ്. അതേസമയം മദ്യപിച്ച് പ്രശ്നമുണ്ടാക്കുന്നവരെയും, വാഹനമോടിക്കുന്നവരെയും പിടികൂടാൻ നിർദ്ദേശിച്ചിട്ടുമുണ്ട്. ഇവരെ സ്റ്റേഷൻ ജാമ്യത്തിൽ വിട്ടയക്കാനുമാവും. പൊലീസ് പിടിക്കില്ലെങ്കിലും മദ്യപാനികൾക്ക് ഒരു മുന്നറിയിപ്പ് മദ്യപാനം ആരോഗ്യത്തിന് ഹാനികരം തന്നെയാണ്.