കൊൽക്കത്ത: ലോക്‌സഭാ തിരഞ്ഞെടുപ്പുമായി ബന്ധപ്പെട്ട് കേന്ദ്ര മന്ത്രിയും പിന്നണി ഗായകനുമായ ബാബുൽ സുപ്രിയോ ചിട്ടപ്പെടുത്തിയ ബി.ജെ.പിയുടെ തീം സോംഗ് തിരഞ്ഞെടുപ്പ് കമ്മീഷൻ വിലക്കി. ബംഗാളിൽ ബി.ജെ.പി തയ്യാറാക്കിയ തീം സോംഗിനാണ് തിരഞ്ഞെടുപ്പ് കമ്മീഷൻ വിലക്കേർപ്പെടുത്തിയത്.

തിരഞ്ഞെടുപ്പ് പ്രചാരണങ്ങളുടെ ഭാഗമായി ചിട്ടപ്പെടുത്തിയ പാട്ടിൽ തൃണമൂൽ കോൺഗ്രസിനെക്കുറിച്ച് പരാമർശിച്ചിരുന്നു. അമിത് ചക്രബർത്തി എഴുതിയ ഗാനത്തിൽ ബംഗാളിൽ താമര വിരിയുന്നതായും തൃണമൂൽ കോൺഗ്രസിനോട് ‘നോ’ പറയുന്നതായും കാണിക്കുന്നുണ്ട്. ‘ഈ തൃണമൂൽ കോൺഗ്രസ് ഇനിയുണ്ടാവില്ല’ എന്ന വാചകത്തോടെ ഈ ഗാനം സുപ്രിയോ ട്വീറ്റ് ചെയ്തിരുന്നു. ഗാനത്തിന്റെ ഉള്ളടക്കത്തിനെതിരെ ഭരണകക്ഷിയായ തൃണമൂൽ കോൺഗ്രസ് പരാതി നൽകിയിരുന്നു.

ഗാനത്തിനു മുൻകൂർ അനുമതിയുണ്ടായിരുന്നില്ലെന്നും അനുമതി ലഭിക്കുന്നതിനു മുമ്പുതന്നെ പലയിടത്തും ഇതുപയോഗിച്ചു കണ്ടെന്നും അഡീഷണൽ ചീഫ് ഇലക്ടറൽ ഓഫീസർ സഞ്ജയ് ബസു പറഞ്ഞു. മീഡിയ സർട്ടിഫിക്കേഷൻ ആൻഡ് മോണിറ്ററിംഗ് കമ്മിറ്റിയുടെ (എം.സി.എം.സി) മുൻകൂർ അനുമതിയില്ലാതെ ഗാനം ഉപയോഗിച്ചതു പെരുമാറ്റച്ചട്ട ലംഘനമാണെന്നും അദ്ദേഹം ചൂണ്ടിക്കാട്ടി.