ലണ്ടൻ: ഇന്ത്യയിലെ പൊതുമേഖലാ ബാങ്കുകളിൽ നിന്ന് കോടിക്കണക്കിന് രൂപ വായ്‌പയെടുത്ത് മുങ്ങിയ വിവാദ മദ്യരാജാവ് വിജയ് മല്യയ്‌ക്ക് വീണ്ടും തിരിച്ചടി. തന്നെ ഇന്ത്യയ്ക്ക് കൈമാറരുതെന്ന് ആവശ്യപ്പെട്ട് നൽകിയ അപേക്ഷയാണ് ലണ്ടൻ കോടതി തള്ളിയത്.
ഡിസംബറിലാണ് ലണ്ടനിലെ വെസ്റ്റ്മിനിസ്റ്റർ മജിസ്ട്രേട്ട് കോടതി മല്യയെ ഇന്ത്യയ്ക്ക് കൈമാറാൻ ഉത്തരവ് പുറപ്പെടുവിച്ചത്. ഇതിനെത്തുടർന്നു ഈ വർഷം ആദ്യം മുംബയ് അഴിമതി വിരുദ്ധ കോടതി മല്യയെ പിടികിട്ടാപ്പുള്ളിയായി പ്രഖ്യാപിക്കുകയും ചെയ്തിരുന്നു. കോടതി വിധിക്കെതിരെ മല്യയുടെ അഭിഭാഷകൻ നൽകിയ അപ്പീലാണ് കോടതി തള്ളിയത്.
അതേസമയം, ബ്രിട്ടന്റെ വിട്ടുകിട്ടൽ നിയമമനുസരിച്ച് വിധിയിൽ അന്തിമ തീരുമാനമെടുക്കാൻ ആഭ്യന്തര സെക്രട്ടറിക്കാണ് അന്തിമ അധികാരം. ബ്രിട്ടന്റെ നിയമപ്രകാരം കുറ്റവാളിക്ക് വധശിക്ഷ നൽകില്ലെന്നും മൂന്നാമതൊരു രാജ്യത്തിന് കുറ്റവാളിയെ കൈമാറില്ലെന്നും ഉറപ്പാക്കേണ്ടതുണ്ട്. ഇന്ത്യൻ ശിക്ഷാ നിയമപ്രകാരം ഈ രണ്ടുകാര്യങ്ങളും മല്യയുടെ കേസിൽ ഉൾപ്പെട്ടിട്ടില്ല.