കോഴിക്കോട്: ബി.ജെ.പിയുടെ തിരഞ്ഞെടുപ്പ് പ്രചാരണത്തിന്റെ ഭാഗമായി 'വിജയ് സങ്കല്പ് യാത്ര'യ്ക്ക് നേതൃത്വം നൽകാനായി പ്രധാനമന്ത്രി നരേന്ദ്ര മോദി വെള്ളിയാഴ്ച കോഴിക്കോടെത്തും. വെള്ളിയാഴ്ച വൈകിട്ട് കോഴിക്കോട് ബീച്ചിലാണ് ബി.ജെ..പിയുടെ പ്രചാരണ പരിപാടി. സംഘടിപ്പിക്കുന്നത്. പ്രത്യേക വിമാനത്തിൽ കരിപ്പൂരിലെത്തുന്ന പ്രധാനമന്ത്രി നരേന്ദ്ര മോദി റോഡ് മാർഗം ബീച്ചിലെ പ്രചാരണ വേദിയിലെത്തും.
എൻ.ഡി.എ നേതാക്കൾക്കൊപ്പം കഴിഞ്ഞ ദിവസം മുന്നണിയിൽ ചേർന്ന ജനപക്ഷം പാർട്ടി നേതാവ് പി.സി ജോർജും മോദിയെ സ്വീകരിക്കാനായി കോഴിക്കോട് എത്തുന്നുണ്ട്. ബി.ജെ.പി സംസ്ഥാന അദ്ധ്യക്ഷൻ പി.എസ്.ശ്രീധരൻ പിള്ളയും മറ്റു ബി ജെ പി-എൻ.ഡി.എ നേതാക്കളും, എൻ.ഡി.എയുടെ ലോക്‌സഭാ സ്ഥാനാർത്ഥികളും പരിപാടിയിൽ പങ്കെടുക്കാനെത്തും.
അമ്പതിനായിരത്തോളം പ്രവർത്തകർ പങ്കെടുക്കുമെന്നാണ് പ്രതീക്ഷ. സമ്മേളനത്തോടനുബന്ധിച്ച്‌ വെള്ളിയാഴ്ച വൈകിട്ട് ജില്ലയിൽ ഗതാഗത നിയന്ത്രണം ഏർപ്പെടുത്തിയിട്ടുണ്ട്.