ആരാധികയുടെ രസികൻ പോസ്റ്രിന് മറുപടിയുമായി നടൻ ഉണ്ണി മുകുന്ദൻ രംഗത്ത്. സണ്ണി വെയ്‌നിനെ പോലെ പെട്ടന്നൊരു ദിവസം വിവാഹം കഴിക്കാനാണ് തീരുമാനമെങ്കിൽ ഉണ്ണി മുകുന്ദന്റെ അഞ്ചു തലമുറയെ പ്രാകി നശിപ്പിച്ചു കളയുമെന്നായിരുന്നു ആരാധികയുടെ പോസ്റ്റ്. കണ്ണൂർ സ്വദേശിയായ അഞ്ജന എലിസബത്ത് സണ്ണി എന്ന യുവതിയാണ് ഫേസ്ബുക്ക് പോസ്റ്റുമായി രംഗത്തെത്തിയത്.

അഞ്ജന പോസ്റ്റ് ഇങ്ങനെ, ഉണ്ണി മുകുന്ദനോടാണ്.. വല്ല ലൈനോ, കല്യാണം കഴിക്കാൻ പാകത്തിലുള്ള ബാല്യകാല സുഹൃത്തുക്കളോ ഉണ്ടെങ്കിൽ ഇപ്പൊ പറഞ്ഞോണം. അല്ലാതെ പെട്ടൊന്നോരീസം ഇങ്ങനെ ഗുരുവായൂർ പോയി താലികെട്ടീന്നെങ്ങാനും അറിഞ്ഞാൽ താങ്കളുടെ അടുത്ത അഞ്ചു തലമുറയെ വരെ ഞാൻ പ്രാകി നശിപ്പിച്ചു കളയും…ങാ!! എന്നാലും എന്റെ സണ്ണിച്ചായൻ.

ഉണ്ണി മുകുന്ദന്റെ മറുപടി കുറിപ്പ് ഇങ്ങനെ, ഈ കുറിപ്പ് ഫോർവേഡ് മെസേജ് ആയാണ് ഉണ്ണി മുകുന്ദന് കിട്ടിയത്. ഉടനെ തന്നെ അതിന്റെ സ്‌ക്രീൻ ഷോട്ട് സഹിതം ഉണ്ണി മറുപടിയും എഴുതി. അതിങ്ങനെ; ഒരു ഫോർവേഡഡ് മെസ്സേജ് കിട്ടി. എന്തായാലും കണ്ടപ്പോ ഒരു മറുപടി കൊടുക്കാൻ മികച്ച ഒരിത്. 'ലൈൻ' എന്ന് പറഞ്ഞത് ഞാൻ ഇഷ്ടപെടുന്ന ഒരു പെൺകുട്ടിയെക്കുറിച്ചാണെങ്കിൽ അങ്ങനെ ഒരാൾ ഇല്ല അഞ്ജന, പിന്നെ ബാല്യകാല സുഹൃത്തുക്കൾ ഒക്കെ പണ്ടേ കെട്ടി പോയി.. പെട്ടന്നൊന്നും പ്ലാൻ ഇല്ല. എന്തൊക്കെ ആയാലും അഞ്ച് തലമുറയെ പ്രാകി കളയരുത് അതൊക്കെ കൊഞ്ചം ഓവർ അല്ലെ?