ഗാനരചയിതാവ് വൈരമുത്തുവിനെ നേരിട്ട് കണ്ടാൽ കരണത്തടിക്കുമെന്ന് ഗായിക ചിന്മയി ശ്രീപാദ. ആ ഒരു നീതി മാത്രമെ തനിക്ക് ലഭിക്കുകയുള്ളുവെന്നും, ഇപ്പോൾ അതിനുള്ള പ്രായവും ധൈര്യവുമുണ്ടെന്നും ചിന്മയി ട്വിറ്ററിൽ കുറിച്ചു. കഴിഞ്ഞദിവസം തിരഞ്ഞെടുപ്പ് പ്രചാരണത്തിനിടെ മോശമായി പെരുമാറിയ യുവാവിന്റെ മുഖത്ത് നടി ഖുശ്ബു അടിച്ച സംഭവത്തോട് പ്രതികരിക്കുകയായിരുന്നു ചിന്മയി.

ഇക്കഴിഞ്ഞ ഒക്ടോബറിലാണ് വൈരമുത്തുവിനെതിരെ മീ ടൂ ആരോപണവുമായി ചിന്മയി രംഗത്തെത്തിയത്. സ്വിറ്റ്സർലന്റിലെ ഒരു പരിപാടിക്കിടെ വൈരമുത്തുവിനെ ഒരു ഹോട്ടലിൽ ചെന്ന് കാണണമെന്നാവശ്യവുമായി സംഘാടകരിലൊരാൾ സമീപിച്ചു. എന്നാൽ അത് നിരസിച്ച് ഇന്ത്യയിലേക്ക് മടങ്ങാനൊരുങ്ങിയ തന്നോടും അമ്മയോടും എല്ലാം അവസാനിച്ചുവെന്ന് കരുതിക്കോളൂ എന്നുമായിരുന്നു അവരുടെ മറുപടി എന്നും ചിന്മയി ആരോപിച്ചിരുന്നു. ഈ സംഭവത്തിനു മുമ്പും വൈരമുത്തു തന്നെ ജോലി സ്ഥലത്തു വച്ച് അപമാനിക്കാൻ ശ്രമിച്ചിട്ടുണ്ടെന്നും ചിന്മയി വെളിപ്പെടുത്തിയിരുന്നു.

വൈരമുത്തുവിനെതിരെ ദേശീയ വനിതാ കൗൺസിലിലടക്കം പരാതി നൽകിയെങ്കിലും യാതൊരു നടപടിയും ഇതുവരെ അവർ സ്വീകരിച്ചിട്ടില്ലെന്ന് ചിൻമയി പറയുന്നു. കേന്ദ്രമന്ത്രി മനേക ഗാന്ധി ഈ വിഷയത്തിൽ ഇടപ്പെട്ടുവെങ്കിലും ഇതുവരെ പരിഹാരം ഉണ്ടായിട്ടില്ല.