കൊച്ചി: ഭാര്യയെ കൊന്ന കേസിൽ ജീവപര്യന്തം തടവുശിക്ഷ വിധിച്ചിരുന്ന ബിജു രാധാകൃഷ്ണനെ ഹൈക്കോടതി വെറുതെവിട്ടു. ബിജുവിന്റെ അമ്മ രാജമ്മാളിനെയും കോടതി വെറുതെവിട്ടു. ഹെെക്കോടതി ഡിവിഷൻ ബഞ്ചിന്റേതാണ് വിധി. ജീവപര്യന്തം തടവിനു ശിക്ഷിച്ച വിചാരണക്കോടതി ഉത്തരവിനെതിരെ ബിജു രാധാകൃഷ്ണൻ നൽകിയ ഹർജിയിലാണ് ഹൈക്കോടതി ഡിവിഷൻ ബെഞ്ചിന്റെ ഉത്തരവ്.

2006 ഫെബ്രുവരി നാലിന് ആദ്യ ഭാര്യ രശ്മിയെ കൊലപ്പെടുത്തിയെന്ന കേസിലാണ് ബിജു രാധാകൃഷ്ണന് വിചാരണക്കോടതി ജീവപര്യന്തം തടവും ഒരു ലക്ഷം രൂപ പിഴയും വിധിച്ചത്. ഇതിനെതിരെ നൽകിയ അപ്പീലിൽ ബിജു രാധാകൃഷ്ണൻ നേരിട്ടാണ് ഹൈക്കോടതിയിൽ വാദിച്ചത്. നേരിട്ടു ഹാജരായി വാദിക്കാൻ അനുവദിക്കണമെന്നാവശ്യപ്പെട്ട് ബിജു രാധാകൃഷ്ണൻ നൽകിയ അപേക്ഷ ഹൈക്കോടതി അംഗീകരിക്കുകയായിരുന്നു. കുറ്റക്കാരെന്നു കണ്ടെത്താനുള്ള തെളിവുകൾ പര്യാപ്തമല്ലെന്നു ചൂണ്ടിക്കാട്ടിയാണ് കോടതി നടപടി.