ലക‌്‌നൗ: ഉത്തർപ്രദേശിലെ ബി.ജെ.പി സ്ഥാനാർത്ഥിയായ സാക്ഷി മഹാരാജിന്റെ വോട്ട് അഭ്യർത്ഥന വിവാദത്തിൽ. ഞാൻ സന്യാസിയാണ് തനിക്ക് വോട്ട് ചെയ്തില്ലെങ്കിൽ ജനങ്ങളെ ശപിക്കുമെന്ന് പറഞ്ഞായിരുന്നു സാക്ഷിയുടെ വോട്ടഭ്യർത്ഥന.
തിരഞ്ഞെടുപ്പ് പ്രചാരണ വേളയിലായിരുന്നു അദ്ദേഹത്തിന്റെ വിവാദ പ്രസ്താവന.
''ഞാൻ ഒരു സന്യാസിയാണ്. നിങ്ങളുടെ വോട്ടിനായി അപേക്ഷിക്കുന്നു. എന്നെ നിങ്ങൾ നിരാകരിക്കുകയാണെങ്കിൽ നിങ്ങളെ ഞാൻ ശപിക്കും, നിങ്ങളുടെ കുടുംബങ്ങളിലെ സന്തോഷം ഇല്ലാതാക്കും'' - സാക്ഷി മഹാരാജ് പറഞ്ഞു. സാക്ഷി മഹാരാജിന്റെ പ്രസ്താവനകൾ നേരത്തേയും വിവാദത്തിലായിരുന്നു.
ലോക്‌സഭ തിരഞ്ഞെടുപ്പിൽ തനിക്ക് സീറ്റ് നൽകിയില്ലെങ്കിൽ ബി.ജെ.പിക്ക് കനത്ത തിരിച്ചടി നേരിടേണ്ടിവരുമെന്ന് സാക്ഷി മഹാരാജ് നേരത്തെ ഭീഷണി മുഴക്കിയിരുന്നു. കൂടാതെ, ഇത്തവണത്തെ ലോക്‌സഭാ തെരഞ്ഞെടുപ്പിൽമോദി ജയിച്ചാല്‍ രാജ്യത്ത് ഇനിയൊരു തെരഞ്ഞെടുപ്പ് ഉണ്ടാവില്ലെന്നുള്ള അദ്ദേഹത്തിന്റെ പ്രസ്താവനയും വിവാദമായിരുന്നു. താനൊരു സന്യാസിയാണെന്നും ഭാവി തനിക്ക് മുൻകൂട്ടി പ്രവചിക്കാനാകും എന്നാണ് സാക്ഷി മഹാരാജ് അന്ന് പറഞ്ഞത്.