ന്യൂഡൽഹി∙ എഞ്ചിനിൽ നിന്ന് അസാധാരണ ശബ്ദം കേട്ടതിനെ തുടർന്ന് ഇൻഡിഗോ വിമാനം അടിയന്തരമായി തിരിച്ചിറക്കി. ഇൻഡിഗോയുടെ എ320 നിയോ വിമാനമാണ് ശബ്ദത്തെ തുടർന്ന് തിരിച്ചിറക്കിയത്.

പറന്ന് ഉയർന്നതിന് ശേഷം വിമാനത്തിന്റെ രണ്ടാം എഞ്ചിനിൽ നിന്ന് അസാധാരണമായ തരത്തിൽ ശബ്ദം ഉണ്ടാവുകയായിരുന്നു. ഉടൻ തന്നെ അനുമതി തേടിയ പൈലറ്റ് വിമാനം തിരികെ പറത്തുകയായിരുന്നു. ഡൽഹി-മുംബൈ യാത്രയ്ക്കിടെ എഞ്ചിനിൽ പക്ഷി വന്നിടിച്ചിരുന്നതായി വിമാനത്തിന്റെ അധികൃതർ പറഞ്ഞു.

നേരത്തേയും ഇൻഡിഗോയുടെ എ320 നിയോ വിമാനം പല സാങ്കേതിക പ്രശ്നങ്ങൾ നേരിട്ടിരുന്നു. അതിൽ ഒന്നായിരുന്നു എഞ്ചിൻ വൈബ്രേഷൻ. ഇൻഡിഗോയുടെയും ഗോ എയറിന്റെയും വിമാനങ്ങൾക്ക് കുറഞ്ഞത് 15 തവണയെങ്കിലും മിഡ് എയർ എഞ്ചിൻ പ്രശ്നങ്ങൾ റിപ്പോർട്ടു ചെയ്തിട്ടുണ്ടെന്ന് ഇവയോട് അടുത്ത വൃത്തങ്ങൾ വ്യക്തമാക്കി.