വിനയ് ഫോർട്ടിനെ നായകനാക്കി നവാഗതനായ അഷ്റഫ് ഹംസ തിരക്കഥ എഴുതി സംവിധാനം ചെയ്യുന്ന തമാശയുടെ ഫസ്റ്റ്‌ ലുക്ക് പോസ്റ്റർ പുറത്തിറങ്ങി. ഹാപ്പി ഹവേഴ്സിന്റെ ബാനറിൽ സമീർ താഹിർ, ഷൈജു ഖാലിദ്, ലിജോ ജോസ് പെല്ലിശ്ശേരി, ചെമ്പൻ വിനോദ് ജോസ് എന്നിവർ ചേർന്നാണ് ചിത്രം നിർമിക്കുന്നത്.
കട്ടിമീശയും കഷണ്ടി തലയും കൈയ്യിലൊരു പുസ്തകവുമായി ബോർഡിന് മുന്നിൽ നിന്ന് മലയാളം പഠിപ്പിക്കുന്ന ഒരു കോളേജ് അധ്യാപകനായി വിനയ് ഫോർട്ട് നിൽക്കുന്ന ചിത്രമാണ് പോസ്റ്ററിലുള്ളത്. ഒരിടവേളക്ക് ശേഷം സമീർ താഹിർ ഛായാഗ്രഹണം നിർവഹിക്കുന്ന റൊമാന്റിക്ക് കോമഡി ചിത്രമാണ് തമാശ.
ദിവ്യ പ്രഭ, ഗ്രേസ് ആന്റണി, ചിന്നു സരോജിനി, എന്നിവർ നായികമാരായി എത്തുന്ന ചിത്രത്തിൽ നവാസ് വള്ളിക്കുന്ന്, അരുൺ കുര്യൻ, ആര്യ സാലിം എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. മുഹ്സിൻ പരാരിയുടെ വരികൾക്ക് റെക്സ് വിജയൻ, ഷഹബാസ് അമൻ എന്നിവർ സംഗീത സംവിധാനം നിർവഹിച്ചിരിക്കുന്നു. ചിത്രം ഈദ് റിലീസായി തിയ്യറ്ററുകളിൽ എത്തിക്കാനാണ് അണിയറക്കാരുടെ ശ്രമം.