ന്യൂഡൽഹി: ഉത്തർപ്രദേശ് മുഖ്യമന്ത്രി യോഗി ആദിത്യനാഥിനും ബി.എസ്.പി അദ്ധ്യക്ഷ മായാവതിക്കും തിരഞ്ഞെടുപ്പ് പ്രചാരണ പരിപാടികളിൽ പങ്കെടുക്കുന്നതിന് വിലക്കേർപ്പെടുത്തി. പെരുമാറ്റ ചട്ടം ലഘിച്ചതിന് തിരഞ്ഞെടുപ്പ് കമ്മിഷനാണ് വിലക്ക് ഏർപ്പെടുത്തിയത്. യോഗി ആദിത്യനാഥിന് മൂന്ന് ദിവസവും മായാവതിക്ക് രണ്ട് ദിവസത്തെ വിലക്കുമാണ് ഏർപ്പെടുത്തിയത്.

പ്രചാരണത്തിനിടെ വിദ്വേഷ പ്രസംഗങ്ങൾ നടത്തിയ ഇരുവർക്കുമെതിരെ നടപടി സ്വീകരിക്കാത്ത തിരഞ്ഞെടുപ്പ് കമ്മിഷനെ സുപ്രീം കോടതി നേരത്തെ രൂക്ഷമായി വിമർശിച്ചിരുന്നു. ഇതിന് പിന്നാലെയാണ് നടപടി.

തിരഞ്ഞെടുപ്പ് കമ്മിഷന് സ്വന്തം അധികാരത്തെ കുറിച്ച് ബോദ്ധ്യം ഇല്ലേയെന്ന് സുപ്രീം കോടതി വിമർശനത്തിനിടെ ചോദിച്ചിരുന്നു. എന്നാൽ പെരുമാറ്റ ചട്ടം ലംഘിക്കുന്നവർക്ക് ഉപദേശക സ്വഭാവമുള്ള നോട്ടീസ് അയയ്ക്കാൻ മാത്രമാണ് തങ്ങൾക്ക് അധികാരമുള്ളത്. തുടർച്ചയായി ഇത് ലംഘിക്കുന്നവർക്കെതിരെ പരാതി നൽകാൻ മാത്രമേ കഴിയുകയുള്ളുവെന്നും അവരെ അയോഗ്യരാക്കാൻ തങ്ങൾക്ക് കഴിയില്ലെന്നും തിരഞ്ഞെടുപ്പ് കമ്മിഷൻ സുപ്രീം കോടതിയെ അറിയിച്ചിരുന്നു.

ഈ സാഹചര്യത്തിൽ നാളെ തിരഞ്ഞെടുപ്പ് കമ്മിഷൻ അംഗങ്ങളോട് സുപ്രീം കോടതിയിൽ ഹാജരാകാനും കോടതി നിർദ്ദേശം നൽകിയിട്ടുണ്ട്. കമ്മിഷന് ഏത് തരത്തിലുള്ള അധികാരമാണുള്ളതെന്ന് നാളെ പരിശോധിക്കാമെന്നും സുപ്രീം കോടതി അറിയിച്ചിട്ടുണ്ട്.