ന്യൂഡൽഹി: ഈ വർഷം കേരളമുൾപ്പെടെ രാജ്യത്ത് എല്ലായിടത്തും കനത്ത മഴ ലഭിക്കുമെന്ന് കേന്ദ്ര ഭൗമ മന്ത്രാലയം അറിയിച്ചു. കേരളത്തിൽ കഴിഞ്ഞ വർഷത്തെ പോലെ പ്രളയത്തിന് സാധ്യത ഉണ്ടോ എന്ന കാര്യത്തിൽ ഇപ്പോൾ ഒന്നും പറയാനാകില്ലെന്നും മന്ത്രാലയം അറിയിച്ചു. സംസ്ഥാനത്ത് ഏപ്രിൽ മാസത്തിൽ ഉയർന്ന താപനില അനുഭവപ്പെടുമെന്നും അറിയിപ്പിൽ പറയുന്നു.

പസഫിക് സമുദ്രത്തിന് മുകളിൽ കനത്ത മഴയ്ക്ക് കാരണമാകുന്ന എൽനിനോ പ്രതിഭാസം രൂപപ്പെട്ടിട്ടുണ്ട്. ജൂലായ് മാസത്തോടെ ഇതിന്റെ ശക്തി കുറയുകയും കേരളത്തിലുൾപ്പെടെ രാജ്യത്തിന്റെ പലഭാഗത്തും കനത്ത മഴ ലഭിക്കുമെന്ന് കേന്ദ്ര ഭൗമ മന്ത്രാലയം സെക്രട്ടറി എം.രാജീവൻ പറഞ്ഞു. എൽനിനോ പ്രതിഭാസം കാരണം കാലവർഷം വൈകാൻ സാധ്യതയുണ്ട്. എന്നാൽ മേയ് മാസത്തോടെ കേരളത്തിൽ ചൂട് കുറയുമെന്നും അദ്ദേഹം പറഞ്ഞു.

രാജ്യത്ത് കാർഷിക മേഖലയ്ക്ക് സഹായകമാകുന്ന വിധത്തിൽ പരക്കെ മഴ ലഭിക്കുമെന്നാണ് ഭൗമ മന്ത്രാലയത്തിന്റെ അറിയിപ്പ്. ജൂൺ ആദ്യ വാരത്തോടെ മൺസൂൺ മഴ ലഭിച്ചു തുടങ്ങും. മേയ് പകുതിയോടെ മൺസൂണിന്റെ ആരംഭം കൃത്യമായി പ്രവചിക്കാൻ സാധിക്കുമെന്നാണ് മന്ത്രാലയത്തിന്റെ കണക്കു കൂട്ടൽ. 17% വരൾച്ചയാണ് രാജ്യം അഭിമുഖീകരിക്കേണ്ടി വരുമെന്നും മൺസൂണിന്റെ അളവ് 39% ആയിരിക്കുമെന്നുമാണ് ഭൗമകേന്ദ്രത്തിന്റെ പ്രവചനം.