മോഹൻലാലിന്റെ ലൂസിഫറും മമ്മൂട്ടിയുടെ മധുരരാജയും ഒക്കെയായി അവധിക്കാലം ശരിക്കും സിനിമാക്കാലമായി ആഘോഷിക്കുകയാണ് മലയാളികൾ. അതിനിടെ ഇതാ ആരാധകർക്ക് ഒരു സന്തോഷ വാർത്ത എത്തുകയാണ്. പൃഥ്വിരാജിന്റെ ആദ്യ സംവിധാന സംരംഭമായ ലൂസിഫർ തമിഴിൽ പോകാൻ ഒരുങ്ങുന്നു. തല അജിത്താകും ചിത്രത്തിൽ നായകനായി എത്തുക. ഇതു സംബന്ധിച്ചുള്ള ആദ്യ വിവരം അജിത്ത് തന്നെയാണ് പുറത്തുവിട്ടത്.
ചിത്രം താൻ കണ്ടിട്ടില്ല, എങ്കിലും മോഹൻലാൽ സർ നന്നായി അവതരിപ്പിച്ചുവെന്ന് അറിഞ്ഞു. അതുപോലെ എസ്റ്റാബ്ലിഷ്ഡായിട്ടുള്ള ഒരു കഥാപാത്രം ഞാൻ പെട്ടെന്ന് ചെയ്താൽ പ്രേക്ഷകർ ഏറ്റെടുക്കുമോയെന്ന് അറിയില്ല. എല്ലാം ശരിയായി വന്നാൽ രണ്ടു വർഷത്തിനു ശേഷം തിരക്കഥയിലും, കഥയിലും കാര്യമായ മാറ്റങ്ങൾ വരുത്തി സിനിമ ഒരുക്കാൻ ശ്രമിക്കും എന്നാണ് അജിത്ത് വ്യക്തമാക്കിയത്.
ചിത്രം തമിഴിൽ ഒരുക്കുമ്പോൾ അജിത്ത് തന്നെ നായകനാകണമെന്ന് പറഞ്ഞ് സോഷ്യൽ മീഡിയയിൽ വലിയ ക്യാമ്പെയിനിംഗ് ആണ് നടക്കുന്നത്. നയൻതാര നായികയായ വിശ്വാസമാണ് അജിത്തിന്റേതായി ഒടുവിൽ റിലീസായ ചിത്രം. മമ്മൂട്ടിയെ നായകനാക്കി വൈശാഖ് ഒരുക്കിയ മധുരരാജയ്ക്ക് മൂന്നാം ഭാഗം വരുന്നുവെന്ന വാർത്തയും കഴിഞ്ഞ ദിവസങ്ങളിൽ പുറത്തുവന്നിരുന്നു. ഈ ടീം ഒന്നിച്ച പോക്കിരിരാജയുടെ രണ്ടാം ഭാഗമായിരുന്നു മധുരരാജ.