മുംബയ്: നരേന്ദ്രമോദി വീണ്ടും അധികാരത്തിലെത്തുന്നത് തന്നെ ഭയപ്പെടുത്തുന്നുവെന്ന് എൻ.സി.പി അദ്ധ്യക്ഷൻ ശരദ് പവാർ. മഹാരാഷ്ട്രയിലെ ബരാമതിയിൽ നടന്ന തിരഞ്ഞെടുപ്പ് റാലിയിൽ സംസാരിക്കുകയായിരുന്നു അദ്ദേഹം.
"എന്റെ വിരൽ തുമ്പ് പിടിച്ചാണ് താൻ രാഷ്ട്രീയത്തിലേക്ക് വന്നതെന്നാണ് മോദി പറയുന്നത്. പക്ഷേ ഇപ്പോൾ എനിക്ക് വല്ലാത്ത ഭയമാണ്. ഈ മനുഷ്യൻ ഇനി എന്താണ് ചെയ്യാൻ പോകുന്നതെന്ന്. ആർക്കും അറിയില്ല" പവാർ പറഞ്ഞു. ബരാമതിയിൽ ശരദ് പവാറിന്റെ മകൾ സുപ്രിയ സുലെയാണ് മത്സരിക്കുന്നത് ഇവിടുത്തെ സിറ്റിംഗ് എം.പിയാണ് സുപ്രിയ.
ഇത്തവണ ബരാമതി സീറ്റ് പിടിച്ചെടുക്കുമെന്ന് നേരത്തെ അമിത് ഷാ പ്രഖ്യാപിച്ചിരുന്നു. ഏഴ് റാലികൾ മോദി മഹാരാഷ്ട്രയിൽ നടത്തിയെന്നും എല്ലാത്തിലും മോദി പരാമർശിച്ചത് തന്റെ പേരാണെന്നും ശരദ് പവാർ പറഞ്ഞു.
ലോക്സഭാ തിരഞ്ഞെടുപ്പിനൊടുവിൽ ബി.ജെ.പി ഏറ്റവും വലിയ ഒറ്റകക്ഷി ആയേക്കുമെന്നും എന്നാൽ, മോദി വീണ്ടും പ്രധാനമന്ത്രിയാകില്ലെന്നും നേരത്തെ പവാർ പറഞ്ഞിരുന്നു. ബി.ജെ.പി ഏറ്റവും വലിയ ഒറ്റകക്ഷി ആകുമെങ്കിലും സർക്കാർ രൂപീകരിക്കാനുള്ള അംഗബലം ബി.ജെ.പിക്കുണ്ടാവില്ല. മറ്റ് രാഷ്ട്രീയ പാർട്ടികളുടെ പിന്തുണയില്ലാതെ ബി.ജെ.പിക്ക് സർക്കാർ രൂപീകരിക്കാൻ സാധിക്കില്ലെന്നും ശരത് പവാർ പറഞ്ഞിരുന്നു.