ന്യൂഡൽഹി: കോൺഗ്രസ് നേതാവും പഞ്ചാബ് മന്ത്രിയുമായ നവജ്യോത് സിംഗ് സിദ്ദുവിന് തിരഞ്ഞെടുപ്പ് കമ്മീഷന്റെ നോട്ടീസ്. പ്രധാനമന്ത്രി നരേന്ദ്ര മോദിയെ പരാജയപ്പെടുത്താൻ മുസ്ലിങ്ങളുടെ വോട്ട് ഏകീകരിക്കണമെന്ന് ആഹ്വാനം ചെയ്തതിനാണ് തിരഞ്ഞെടുപ്പ് കമ്മീഷൻ നോട്ടീസ് അയച്ചത്. ബിഹാറിലെ കതിഹാർ ജില്ലയിൽ തിരഞ്ഞെടുപ്പ് റാലിയിൽ നടത്തിയ പ്രസംഗത്തിന്റെ പേരിൽ സിദ്ദുവിന്റെ പേരിൽ കേസും രജിസ്റ്റ‌ർ ചെയ്തിട്ടുണ്ട്.

പ്രാഥമിക പരിശോധനയിൽ സിദ്ദു ചട്ടലംഘനം നടത്തിയെന്ന് കണ്ടെത്തിയതായി തിരഞ്ഞെടുപ്പ് കമ്മീഷൻ അറിയിച്ചു. രാഷ്ട്രീയ നേട്ടങ്ങൾക്ക് മതപരമായ പരാമർശങ്ങൾ നടത്തരുതെന്ന സുപ്രീം കോടതി നിർദ്ദേശത്തിന് എതിരാണ് സിദ്ദുവിന്റെ പ്രസ്താവനയെന്നും കമ്മീഷൻ വ്യക്തമാക്കി. ഇത് സംബന്ധിച്ച് 24 മണിക്കൂറിനകം വിശദീകരണം നൽകണമെന്ന് സിദ്ദുവിനോട് തിരഞ്ഞെടുപ്പ് കമ്മീഷൻ ആവശ്യപ്പെട്ടു.