കണ്ണൂർ: യു.ഡി.എഫ് സ്ഥാനാർത്ഥി കെ.സുധാകരൻ ഫേസ്ബുക്കിൽ പോസ്റ്റ്‌‌‌‌‌ ചെയ്ത വീഡിയോ തിരഞ്ഞെടുപ്പ് ചട്ടലംഘനമാണെന്ന് കണ്ണൂർ ജില്ലാ കളക്ടർ മിർ മുഹമ്മദ് അലി. സ്ത്രീത്വത്തെ അപമാനിക്കുന്ന രീതിയിൽ ഫേസ്ബുക്കിലൂടെ പ്രചാരണം നടത്തിയ കെ സുധാകരന്റെ നടപടി തിരഞ്ഞെടുപ്പ് ചട്ട ലംഘനമെന്നാണ് കാണിച്ച് കെ സുധാകരന് ജില്ലാ കളക്ടർ നോട്ടീസ് അയച്ചു. മുഖ്യ തെരഞ്ഞെടുപ്പ് ഓഫീസറുടെ നിർദ്ദേശ പ്രകാരമാണ് കളക്ടർ നടപടി ആരംഭിച്ചത്.

'ഓളെ പഠിപ്പിച്ച് ടീച്ചറാക്കിയത് വെറുതെയായി' എന്ന പേരിൽ ഇറങ്ങിയ വീഡിയോ ആണ് സ്ത്രീവിരുദ്ധമാണെന്ന് മുഖ്യ തിരഞ്ഞെടുപ്പ് ഓഫീസറും വനിതാ കമ്മീഷന്റെയും കണ്ടെത്തൽ. ഇതേ വീഡിയോയുടെ പേരിൽ കെ സുധാകരനെതിരെ വനിതാ കമ്മീഷൻ കഴിഞ്ഞ ദിവസം കേസെടുത്തിരുന്നു. വീഡിയോയിലെ കഥാപാത്രങ്ങൾക്ക് പാർലമെന്റിൽ പ്രസംഗിച്ചവരോ ജീവിച്ചിരിക്കുന്നവരോ മരിച്ചവരോ ആയി ബന്ധമില്ല എന്ന് തലക്കെട്ടോടെയാണ് സുധാകരൻ ഫേസ്ബുക്കിലൂടെ വീഡിയോ പ്രചരിപ്പിച്ചത്.

ഈ വീഡിയോ എൽ.ഡി.എഫ് സ്ഥാനാർത്ഥി പി.കെ.ശ്രീമതി ടീച്ചറെ ആക്ഷേപിക്കുന്നതാണെന്ന ആരോപണവുമായി സി.പി.എം രംഗത്തെത്തിയിരുന്നു. അതേസമയം, കോൺഗ്രസിലെ തന്നെ വനിതാ നേതാക്കളെയും പൊതുരംഗത്തുള്ള മറ്റ് വനിതകളേയും അപമാനിക്കുന്നതാണെന്നും കാണിച്ച് സുധാകരനെതിരെ വൻപ്രതിഷേധമാണ് ഉയർന്നത്.